Shillong, Jylliew 02: Ka kynhun jong ka Mawlai Town Dorbar hapoh ka jingialam jong u Lamphang u Bah SD Khongwir mynta ka sngi kila leit ia kynduh ia u Chief Executive Member jong ka KHADC u Bah Titosstarwell Chyne ha kaba ia dei bad ka iew kaba ka District Council ka kwah ban shna ha Mawlai Mawroh.
Haba kren ha ki lat pathai khubor ha dien ka jingiakynduh bad u CEM, u Bah SD Khongwir u la kren shai ba ha kane ka jingiakynduh kila pynsngew ba lada kane ka iew kan ktah ia ka tyllong um jong ka shnong Mawlai ba dei na u Lum Mawpat kum ka Mawlai Town Dorbar kan nym shah ban shna ia kane ka iew.
Lada kane ka iew kan dei shawei pat kata kin sa ia peit bad ka shong ha kata ka kommittee ban wat ia ka jaka, la iathuh ba ha katei ka kommittee yn pynrung dkhot ruh na ka liang jong ka Mawlai Town Committee bad kaba kongsan ka long ba ba uno uno u ban sha jied ha kata ka kommittee u dei ban sngkhem ka jingmut.
La batai ba u Lum Mawpat u dei u lum ba ai ia ka tyllong um ia ka shnong Mawlai baroh kawei ia kaba la tip kum ka Umsohlang bad ka Mawlai ka ioh ia ka tyllong um jong ka na kane ka Umsohlang bad kane ka tyllong um mynta kala iaid la 50 snem bad la don kam ban shna thymmai ia ki jaka tan um.
Ha kane ka jingiakynduh la iathuh ba na ka liang jong u CEM jong ka KHADC u la kren shai ba kane ka dang dei tang ha ka jingpyrkhat bad kam pat dei ruh ba ka la don ha ka plan ka dang dei tang ka jingleit peit ia kane ka jaka.
Na ka liang jong ka Mawlai Town Dorbar ka pynpaw pyrshah ka long ba kila iohi ba ka iew kan long kumno namar ba kila iohi ia ka Iewduh, ka jingpyrshah jong ki kam da dei eh ia ka iew hynrei ka jingpyrshah ka long ba kata ka iew kam dei ban ktah ia ka tyllong um lada ka ktah ia ka tyllong um kim nym shah da lei lei ruh em.
Ha kane ka jingiakynduh na ka liang jong ka KHADC la don lang u Bah Gigur Myrthong Deputy CEM, Kong Grace Mary Kharpuri EM, katba na ka liang jong ka Mawlai Town Dorbar la don lang ruh kiwei kiwei ki rangbah shnong kiba dei ki dkhot jong ka Mawlai Town Dorbar.
