Shillong, Jylliew 07: Ki nongialam jong ka North Eastern Hill University Student’s Union (NEHUSU) mynta ka sngi kila pynpaw ba hapoh jong katei ka skul bah ki don kumba 100 tylli ki kam hikai kiba lait ia kaba kam shym la thung haduh mynta bad bun spah tylli pat ha ki kam ophis.
Haba kren ha ki nongthoh khubor u Bah Rangdajied Marwein ha ka jingiadon lang ki dkhot ka seng mynta ka sngi kila pynpaw ia ka jingsngew diaw ka jong ki ia ka jingleh stieng jong kane ka skul bah ha kaba kam shym la khot aplikoshon ban thung kam hikai wat la ki lait palat 100 tylli.
La iathuh ba kaei kaba ka NEHU ka leh ka long ba, ha ka jaka ban thung ia ki nonghikai kiba pura kala shu khot ia ki briew ban trei kontrak kane ka ktah ia ka jingpule jong ki samla pule ha kane ka skul bah khamtam eh ia kito kiba kwah ban pyndep ia ka Ph D jong ki.
Haba ia dei bad kane na ka liang jong ka University Grant Commission (UGC) kaba dei peit ia ki skul bah ha ka Ri India baroh kawei kala pynmih ia ka hukum ba lada kano kano ka skul bah kam thung ia ki nonghikai ha dien ba la lait hapoh ka hynriew bnai ka not noh ia ka jingai pisa.
Na ka liang jong ka seng samla pule hapoh kane ka skul bah kin sa ia kynduh ia u Vice Chancellor halor kane ka phang ba dawa ba ka NEHU ka dei ban pyndep noh ia ka jingthung ia ki nonghikai ba pura khang ba kan nym shah khate ka pisa kaba dei na ka bynta kane skul bah lada shah khate kan ktah ia ki samla pule.
Haba phai sha ki nongtrei ha ki ophis kala don ka jingduna briew haduh katta katta bad kane kala buh ia ki samla pule ha ka jingeh bad ha ka jaka ba ka NEHU kan thung ia ki nongtrei ha ki kam ophis kala aiti pynban ia ki kam sha ki riew shimet. Ka jingthulmur ha ka jingpynbna ia ki result ka dei na kane ka daw la kynnoh ka seng NEHUSU.
