Shillong Lber 29: Ki nongialam jong ka Hynniewtrep Youth Council (HYC) mynta ka sngi ki la ai jingmut ia ka tnad Ain ka sorkar jylla ba kadei ban khmih biang sa shisien ha shwa ban pyntreikam ia ka Roster System ha kane ka jylla.
U President ka HYC u bah Robertjune Kharjahrin ryngkat bad u General Secretary ka HYC u bah Roy Kupar Synrem, ha ka jingiakynduh ia ka Myntri ka tnad Ain ka sorkar jylla ki la ai jingmut haba iadei bad ka Roster Mainteinance Policy.
Haba kren sha ki lad pathai khubor, u bah Kharjahrin u la ong ba ki la ai jingmut ia ka sorkar ba ka Roster Maintenance Policy kadei ban treikam beit naduh ka sngi ba pynmih shakhmat bad ym dei ban phai biang shadien.
Katkum ka jingong u President ka HYC u bah Robertjune Kharjahrin, “Na ka liang ka Myntri ka tnad ka tnad Ain ka kong Ampareen ka la pynpaw ba donkam ban peit sa shisien bad ka la kular ban bishar ia kine ki jingai jinngmut bad kan rah ban iakren bad u Myntri Rangbah ka jylla halor kane ka mat namar ba ia kane ka Roster ymdei ba la rai tang da ka tnad Law hynrei la rai da ka kynhun Myntri sorkar MDA ha u snem ba ladep.”
Ha kajuh ka por u la ong ba na ka liang ka seng kan peit ha kine ki shi taiew la ka sorkar ka shimkhia ne em ia kane ka mat bad la byrngem ba lada ka sorkar ka leh mutlop kim banse ban leit sha Iing Kashari ban leh kumba u Myntri Rangbah ka jylla u la kren hapoh ka Iing Dorbar Thawain Mang tyngka dang shen ‘ Ki bym hun ia ka Roster kidei ban leit sha Iing Kashari’.
“ Ka jingkren jong u Myntri Rangbah ka mut ba um kwah shuh ban iakren hapoh ka sorkar. Hynrei ngi watla katta ruh ngi dang ai jingmut ia ka sorkar namar ba lada ngi leit sha Iing Kashari kaba ma ka long ba ioh ka mih shibun ki kynrum kynram. Lada ha ka shi taiew lada ngim iohi ba kan don kano kano ka jingshim khia na kane ka jingiakren ngim banse ban iaid noh sha Iing kashari. Namar ngim kwah ba ka jaidbynriew jong ngi kin duh kam katba kiwei kin ioh kam,” ong u President ka HYC u bah Robertjune Kharjahrin.
