Jowai, Rymphang 11: U President jong ka All Jaintia Hills Transporter Association (AJHTA) u Bah Balen Thubru haba kren ha ka jingialang paidbah kaba la long mynta ka sngi ha 7-Mer ka sngi ha u la batai ba kum ka seng kala dep ban thoh sha ka sorkar ba dei ban pyntrei kam noh ia ka rai kaba la pynmih 10/8/2019 ba ka baikit kan long T. 0.70 pisa shikwintal bad ha ka shitone kan long T.1400 tyngka sha duh Byrnihat.
Haba ia dei bad kane kum ka seng kala leit ban ia kynduh ia u Deputy Commissioner jong ka West Jiantia Hills District ban ia kren kumba la phah da ka sorkar, haba la ia kren bad u DC, na ka liang jong u DC um lah ban shim ia ka rai bad u la phah biang sha ka sorkar ban shim ia ka rai.
Ha kane ka jingialang paidbah la iathuh ruh ba ha ka jingiakren na ka liang jong u kompnei kila ong ba ka dor kaba kin siew kan long katkum ka dor iew kane ka pyni shai ba ki kompeni kin treh ban pyntrei kam ia ka dor kaba la buh da ka sorkar ha kaba ia dei bad ka bai kit.
Haba ia dei bad kane ka jingbym treh ki kompeni ban siew ia ka bai kit katkum ka dor sorkar na ka liang jong ka seng All Jaintia Hills Transporter Association ryngkat bad ka Meghalaya People’s Labour Union mynta kin thoh sha ki kompeni ba ki dei ban pyntrei kam ia ka dor bad kin buh da ka por lada kim treh kin pynlong noh da ka ba sangeh kit dewbilat.
Haba ia dei bad ki toll gate namar ba kim long ki kor ki bor ba don ha kine ki jaka ia kiba la tip kum ka “Fasttag” ka jingshim ia ka bai khyrdop ka dei ban long noh kumba leh mynshuwa ba siew beit da ka pisa, la ong u bah Erwin. Ka jingthmut jong kine ki “Fasttag” kam dei tang ha Meghalaya ka dei ha baroh kawei ka Ri India.
