Shillong, Nohprah 11: Ka seng National People’s Party (NPP) mynta ka sngi kala pynlong ia k
a jingialang paidbah ha Tura ha kaba la ia shim bynta da ki nongialam jong ka seng bad kum juh na ka jylla Manipur bad baroh ki kyrtong jong ka seng kiban ia khunia ka MLA ha u snem 2018, ia ka jingialang la pynlong ha District Auditorium Tura.
Ha kane ka jingalang paidbah u National President u Conrad K. Sangma u la ong ba ka jingkhlad kyndit jong u myntri ba rim u Manirul Islam Sarkar, ka long ka jingduh kaba khraw ia ka party bad na ka liang jong ka party kala shim ia ka rai ban pyniakhun noh da u para jong u, u S.G. Esmatur Mominin (Rohibul) na Phulbari u ba dei ruh u MDC hapoh jong ka GHADC.
Ha kane ka jingialang u la ong ba ka seng NCP ha kane ka kynti kaba mynta kan jop bun bah ki MLA na Khasi Hills bad kum ba ka long u myntri rangbah jong ka jylla un long na Khasi Hills namar ka party kan jam bun na ki lum Khasi. Ha ka juh ka por u la kren birai ba lada kwah ban ioh ia u Myntri rangbah na Garo Hills ka NPP ka dei ban jop palat ia ka 20 ngut ki MLA.
Ha kane ka jingialang paidbah u la ong ba ia kane ka party la pynsan pynheh da u kpa jong u, u Purno A Sangma da ka jingthmu ban pynsngew ia ka jingeh jong ki paidbah ka dong shatei lam mih ngi jong ka Ri India bad ha ka juh ka por kane ka party mynta kala don ia ki MLA ha Rajasthan bad Chhattisgarh.
Kumba ka long ki paidbah kila pdiang ia ka party ha kylleng jong ka Ri India bad ryngkat ka jingangnud ba kane ka party kan lah ban leh ei ei na ka bynta ki paidbah bad ka Ri baroh kawei ka la ithuh ia u mynta ba u dei u khun jong u PA Sangma. Ka jingthaw ia ka NPP ka long na ka bynta ki paidbah ka Dong shatei lam mih ngi jong ka Ri India namar ha Delhi ka jingdon bun paid ka long kaba don kam haba thaw ia ka sorkar.
U la ong ba lada don tang 5 ngut ki MP na North East yn nym don ba sngap ha Delhi bad kumba ka long mynta ka NPP kala thew sha ka thong ban pynsngew ia ki jingeh kane ka thain sha Delhi bad kam don jingartatien ba ka NPP kan sa lah ban leh ia kane ban pynsngew ia ki jingeh kane ka thain ha Delhi.
Ha kane ka jingialang paidbah u Conrad u la kyntu ia ki paidbah jong ka jylla Meghalaya ba kin pynjop bun ia ka NPP bad ha kane ka jingialang u la kren shai ia kaei kaba ka NPP kan leh na ka bynta ka roi ka par jong ka jylla bad ka dong ka thain baroh kawei.
Kiba la kren ha kane ka jingialang ki long u Deputy chief minister jong ka jylla Manipur u Joykumar Singh Yumnam, ha ka jingkren u la ong ba bun sien ia ki paidbah jong ka North East la shah niew bein na ka daw ba iapher ka dur ka darn a kiwei. Kum ki paidbah jong ka thain yn nym lah ban kloet ia kaei kaba u PA Sangma u la ialeh na ka bynta ki paidbah kane ka dong bad ka thain.
Ha kane ka sngi la don lang ruh u myntri ka koit ka khiah, u L. Jayanta Kumar Singh, U myntri ka tnad ia leh kai u Letpao Haokip ki myntri jong ka jylla Manipur bad u National vice-president Phungzathang Tonsing ha ka jingkren u la ong ba ki paidbah jong ka jylla Meghalaya ruh kin sa kyntait ia ka seng Congress ha u snem 2018.
Ka National youth president jong ka NPP ka Ratika Yumnam, kala ong ba dei tang ka NPP kaba lah ban leh namar ka sngewthuh ia ka jingdon kam ki paidbah kane ka thian bad ki paidbah kin sa ai ka jingkyrshan ia kane ka party.
