Umiam, Naitung 07: U kyrtong president jong ka National Democratic Alliance (NDA) u Ram Nath Kovind ha ka jingialap election ka jong u kaba la long mynta ka sngi ha ka jylla Meghalaya ia kaba la pynlong ha Orchid Resort mynta ka sngi u la kular ba lada u shah jied ban long u president jong ka Ri India yn nym leh shilliang iano iano ruh, la ka long ha ka Niam, ki jaidbynriew, ne ka dong bad ka thian ruh kum juh.
Ha ka jingkren jong u Kovind, u la ong ba ka jylla Meghalaya ka long kaba rit, hynrei kane kam pher ha u la ka dei kaba rit ne kaba heh kum ka jylla Utter Pradesh ne Maharashtra hynrei baroh ki ialong kum juh namar ka jylla ka don la ka jong ka bor bad ka iktiar ba la laitluid. Ka jylla Meghalaya wat la ka rit ka don pat ia ka spah mariang kaba bun, ha ka jinglong tynrai bad ki jingtei pynsan nam jong u long shuwa wan shuwa.
Ha ka jingshem bad ka jingiohi ka jong u, ki briew jong kane ka jylla ki long kiba tbit bad kiba biang kim don jingiapher na kiwei, ha u kam pher la ki dei na ka jylla kaba heh ne ka jylla kaba rit hynrei kaba kongsan ka long ba baroh ki dei ki bynta jong ka Ri India. Baroh ki paidbah nongshong shnong ki don ia ka juh ka hok ban ia shim bynta ha kaba kyntiew ia ka roi ka par jong ka Ri ka dong bad ka thain.
Ka Ri India ka don 1.25 million ngut ki paidbah nongshong shnong bad ka dei ka ri kaba khraw tam ha ka synshar paidbah bad ban long president ha ka Ri India ka long ka kam kaba la jied kyrpang, u la ong ba ki la don ki nongialam kiba khraw kiba la long ki president ha ka Ri kaba kila pynkiew burom ia kane ka kyrdan bad ka pyrthei ka tip ia ka synshar paidbah ha ka Ri India.
Na ka liang jong u ne u kyrtong president jong ka NDA, u la kdew shai kdar ba ka Riti synshar jong ka Ri “Constitution” ka dei ka bor kaba ha khlieh duh, haka synshar khaddar, kumta ka dei ka kam kyntang bad ka kamram jong u wei pa u wei u nongshong shnong jong ka Ri India, ym tang u president jong ka Ri ba um bat ia ka riti synshar hynrei la dei lang da baroh. U president jong ka Ri India u dei u khlieh duh jong ki shipai ha ka Ri bad ka kam jong u kaba ha khmat eh ka long ban iada ia u pud u sam jong ka Ri.
U la ong ba naduh ba u la shah jied kum u Lat jong ka jylla Bihar, u la trei ia kam kum ki khlieh ka jylla ban leh ia kano kano ka kam khlem da don kano kano ka jingleh shiliangkhmat ne ia shah liang hynrei u la leh ia kaei kaei kaba dei na ka bynta ki paidbah nongshong shnong jong ka Ri bad ka dong ka thain. La ong ba lada u shah jied un ialeh ban trei na ka bynta ka roi ka par jong ka Ri baroh kawei bad khamtam eh ha ka pule puthi kaba katkum kane ka juk kaba mynta.
U la ong ba ka Ri India ha u snem 2022 kan sa dap 75 snem jong ka jingioh laitluid bad shuwa ban poi kane ka por ka Ri India ka dei ban thaw ia ka India kaba thymmai.Ia kane ka jingialang ialap election la pyniaid da u MP jong ka NPP u Conrad K Sangma bad ki MLA kiba la ia don lang ha kane ka sngi ki long u James K Sangma, uNahim D Shira, jong ka NPP katba na ka UDP, kiba la ia don ki long u Dr Donkupar Roy president UDP, Dr Jemino Mawthoh, Bah Paul Lyngdoh, Bah Titosstarwell Chyne.
