Shillong, Risaw 03: Namar ka jingdum lyoh ka suin beng u Vice President ka Ri India u M. Venkaiah Naidu u la hap ban wan da ka kali na Guwahati sha Shillong mynta ka sngi ban buh ia u Mawnongrim ban shna ia ka surok Shillong Dawki.
Ha ka jingkren mynta ka sngi u la ong ba ba lada um wan da kali na Guwahahti sha Shillong un nym ioh ia ka jingitynnad ka pung Umiam, khlem da don ba poi pyrkhat ba un Vice President ka Ri India un leit ban jngoh ia ka Umiam mynta ka sngi ha lynti ban wan sha Shillong.
U Naidu u la ong ba ka jylla Meghalaya ka don ia ka jingitynnad ka mariang kaba lah ban khring ia shibun ki nongwan jngoh kai pyrthei bad ka pung Umiam kala dei lypa kawei na ki jaka ba khring ia ki paidbah ban wan sha kane ka jaka ba don ka pung kaba Itynnad shisha.
La ong ba ka jingshna ia kane ka surok na Shillong sha Dawki ruh kan khring ia ki nongwan jngohkai namar ka jylla ka don ia ki lum ki them kiba itynnad, kane kan iarap ban kyntiew ia ka ioh ka kot jong ka jylla ha kiba bun ki liang.
U la ong ha ka por ba u long u myntri ka tnad pynroi nongkyndong u la wan teng sha kane ka jylla bad dei ka sien kaba nyngkong mynta ka sngi ba u la wan da ka surok na Guwahahti sha Shillong ha kaba u la ioh ia ka jingitynnad ka mariang jong ka jylla Meghalaya.
U Vice President ka Ri India u la pynpaw ruh ia ka jingitynnad ka mariang ha kane ka jylla Meghalaya lyngba ka twitter jong u shuwa ba un poi sha ka jingialang ha Shillong.
