Shillong, Nailur 06: U Chief Executive Member (CEM) jong ka Jaintia Hills Autonomous District Council (JHADC) u Bah Thombor Shiwat u dei na ka seng Congress, u la kynnoh ia u myntri rangbah ba u la pynshitom ia ki nongtrei jong ka JHADC da kaba bat kai ia ka D.O Letter mynta la shi bnai haba ka JHADC ka pan ia ka bhah jong ka khajana na ki marpoh khyndew.
Haba kren ha u SP News Agency u CEM jong ka JHADC u ba dei na ka seng Congress kaba bat mynta ia ka bor synshar hapoh jong ka JHADC, u la ong “ Lada nga ia pher jingmut bad u Chief Minister, u lah ban pynshitom ia u marwei, katkum ki kyndon jong ka party, hynrei haba phai pat sha ki kam ophis ym dei ban pynshitom bein ia ki nongtrei, namar lada ka JHADC kam ioh ia ka bhah na ki marpoh khyndew la thikna ba ha u bnai ban wan kin nym ioh tulop ki nongtrei.
La iathuh ba u la dep phah mynta la shibnai ia ka D.O Letter sha u myntri rangbah ka jylla u Dr Mukul Sangma ban pan ia ka bhah jong ka JHADC kaba dei na ki marpoh khyndew, hynrei haduh mynta ym pat leh ei ei na ka liang jong ka u myntri rangbah ka jylla halor katei ka jingpan jong ka JHADC.
Hooid, ia ka pisa kaba la lum ha ka dur jong ka khajana ia ki marpoh khyndew ka leit sha ka NGT bad na ka NGT ka phah ia ka pisa sha ka Mining Geology Department bad ki sa pynlait ia ka pisa sha ki District katkum kaba ki dei ban ioh, ha kaba ia kane ka department la bat hi da u myntri rangbah ka jylla.
