Shillong, Jylliew 30: Ka jingiakynduh lang kaba lai sngi kaba la long ha Shillong ban ia kren halor ka phang ban pynneh pynsan ia ka mariang kaba la sdang ha ka 28 tarik mynta u bnai bad la pynkut mynta ka sngi ha kaba u Lat jong ka jylla u Banwarilal Purohit u la ong u kongsan.
Ia kane ka jingiamir jingmut kumno ban pynneh pynsah ia ka mariang la khot da ka Indian Himalayas Climate Adaptation Programme (IHCAP) kaba dei ka kynhun napoh Swiss Agency kaba dei peit ia ki kam pynroi bad ka rukom ia treilang, ryngkat ka tnad Department of Science and Technology (DST), ka sorkar pdeng bad jong ka jylla Meghalaya.
Haba kren ha kane ka sngi kum u kongsan u Lat ka jylla u Banwarilal u laong ba ka jingjulor jong ka mariang ha kine ki arphew snem ha kane ka jylla ka long kaba la jur bha namar ba 70% na ki nongshong shnong kim shym la shim ia ki lad ki lynti kumno ban iada ia ka mariang. Kane ka rukom leh kan ktah jur bha ia ki briew ki sngi ban wan.
U la ong ba ka por ka la dei ban pynlong ia ki jingialang paidbah ban pynsngewthuh ia ki briew ha ki shnong ki thaw bad na ka liang ki lad pathai khubor kiba long ki nongpyn saphriang ia ki lad khubor ki don ia ka bynta kaba khraw ha kaba ia dei bad kane ka bynta ban pynsngewthuh ia ki paidbah ha kaba ia dei bad ka kam pynpynneh pynsah ia ki khlaw ki betap.
Ha kane ka sngi U lat jong ka jylla u la pynpaid paidbah ruh ia ka kot “IHCAP Science Briefs” Naka liang jong ka Shimpy Khurana, Communication Officer, IHCAP bad Dr. S. Ashutosh, IFS, Addl. PCCF, Dy CEO, MBDA u ba dei I ophisar ha kaba ia dei bad ka jingpynneh pynsah ia ka mariang ha ka jylla Meghalaya kila batai ia ka jingthmu jong kane ka jingpynlong ia ka jingialang ban ia kren halor ka mariang ban pynneh pynsah ia ka. U Chief Secretary jong ka jylla u Y.Tsering u la kren ai khublei.
