lah ban pynkylla ia ka Shillong kum ka High Altitude Training Centre: kiren

Shillong, k. Lyngkot 9: U Myntri khynnah ba dei ban khmih ia ka tnat Kam ialehkai jong ka Sorkar Pdeng, u Kiren Rijiju mynta ka sngi u la ong ba lah ban pynkylla ia ka Shillong kum ka High Altitude Training Centre. U la ong ia kane haba u la plié ia ki jingdon jingem na ka bynta ki kam ialehkai ha SAI, Training Centre, NEHU Campus hangne mynta ka sngi.

Ha ka jingwan khmih ia kane ka jaka, u Rijiju u la plié ia ka jaka lehkai Synthetic Athletic Track and Field bad ka madan football synthetic. Da kaba iaroh ia kane ka jaka ba la plié ia ka SAI centre, u la ong, “Kane ka jaka kam da don ha ka jaka kaba jrong haduh katta katta hynrei ka la biang ban ithuh ia ka kum ka high altitude training centre. Kane ka la biang bha bad ka lah ban long ka jaka ba la buh shirta. Bun ki por ki jaka ai jinghikai altitude training centre ki dei kiba tang shipor hynrei kane ka jaka ka biang bha ban kylla long ka jaka ba shirta bad ki nongialehkai bapher bapher ki lah ban wan sha kane ka jaka ban ioh jinghikai ha ka jaka kaba jrong”.

Da kaba kubur ia ki lad ba kane ka jaka ka lah ban plié, u Myntri u la ong, “Ngi duna bha ki high altitude training centre ha India – Kawei ha Shilaroo hajan Shimla, kawei hangne ha Shillong. Ngi don katto katne ki jaka ha South India ha Ooty bad ha ki lum Nilgiri bad nga dang pyrkhat ban shna shuh kum kine ki jaka, lehse ha Meghalaya, Arunachal Pradesh, Aizawl namar kine ki jaka ki dei kiba halor lum”. Kane ka jaka ka don baroh ki jingdon jingem katkum ka juk mynta bad ka don ruh ia ki hostel.

Kumta ngi lah ban phah ia ki nongialehkai na kiwei kiwei ki jylla kumba 1 bnai ne 2 bnai khnang ba kin juh ban ialehkai ha ki jaka ba kham halor, u Myntri u la bynrap. U Myntri u la ong ba ki nongialehkai na ka jylla Meghalaya bad na ka thain shatei lam mihngi ki long kiba don sap bha ha kaba don napdeng kine kiba la wanrah burom ia ka ri ha ki jingialehkai kiba la long ha kylleng ka pyrthei. Hynrei u la ong ba namar ka jingduna ka jingai jinghikai kaba biang, ka jingwad bha ia ki samla ba don sap ka la dkoh bha. Kadei namar kane ba ka thain kam pat kot sha ki kliar ba ka dei ban poi ha ki kam ialehkai.

U la ong ba ka tnat jong u ka la buh thong ba shuwa ka Olympics 2028, ka India ka dei ban don hapeng 10 tylli ki ri kiba paw bha ha ki kam ialehkai. Ban urlong kane, dei ban ban jur bha ha ka jingwad ia ki samla ba don sap ha ki kam ialehkai. U la kren shai ba ki jylla ka thain shatei lam mihngi ki lah ban don ka bynta kaba 20-30% jong ki khusnam ha ki Olympics. U myntri u la ong ba ha ryngkat ka jingkiew ki kam ialehkai, ki karkhana ruh kin kiew bad haba ka ri ka kiew, ki kam ialehkai ruh ki kiew.

Katba dang kiew ka imlang sahlang, katta dang kiew ki kam ialehkai, u la ong. U la ong ba ka thain shatei lam mihngi ka long kaba la kyrkhu ha kane bad ba ka Meghalaya ka dei kawei na ki jaka ba biang tam ym tang ha kane ka thain tangba ha baroh kawei ka ri. U la ong ruh ba ka don ka lad ban ioh jingbei tyngka kham bun na ka tnat Minority Affairs kaba khmih da u. U la ong ba u kwah ban pyndonkam kane ka pisa na kane ka tnat bad dei namar kane ba la kynthup lang ia ki kam ialehkai ha ka mang tyngka jong ka NEC. “Ka NEC ruh kan lah ban pyllait pisa na ka bynta ki kam ialehkai. Kane ka dei kaba thymmai bad nga la ban jur ba kane ka long kaba donkam bha namar ki kam ialehkai ki long kiba kongsan bad mynta ka NEC ka dei ban bei tyngka na ka bynta ki kam ialehkai,” u la ong. Ngi la don ka jingsngewthuh kaba shai bad ki bor pyniaid ia kane ka skul bah khnang ba ngin lah ban shna ia kine ki jingdonkam ha kane ka jaka kyrpang ha ka ri.

Ki briew ha kylleng ka ri ki dei ban tip ba kane ka jaka ka don ka suin bneng kaba biang bha bad ba la shna ia kane ka jaka ai jinghikai kaba biang lut ha baroh ki bynta ha kane ka jaka, u la ong. Hadien kane u Myntri u la leit plie ia ka Assam Rifles Public School (ARPS) ha nongbah Shillong kum ka Khelo India Sports School. Ia mynta, la ai jingmynjur 9 tylli ki Sports School ha kylleng ka nongbah, ha kaba na kine 5 tylli kidei kiba la pyniaid da ki kynhun shipai. Ha ka thain shatei lammihngi, ka Assam Rifles Public School kalong ka Sports School ba nyngkong ba la pynbna hapoh ka skhim Khelo India.Ka Sorkar mynta kan bah khlieh ia ki jinglut jingsep jong ki samla pule jong ka skul kiba don sap ha ki kam ialehkai bad kane ka jinglut ka kynthup naduh ka bai sah, ka pule puthi, ka insurance bad bai dawai, ka jinghikai pyntbit ha ki kam ialehkai bad jingkyrshan, ka jingmihkhmat ha ki rynsan ialehkai bapher bapher, ka tulop jong ki nonghikai pyntbit (coach) bad ki nongtrei, ki tiar ialehkai, bad shibun kiwei kiwei. Ka jingthmu jong ka Khelo India Sports School kalong ban pyniasoh ia ki kam ialehkai bad ka pule puthi bad ha kane ka rukom, yn kyntiew ia ki kam ialehkai ha ka ri bad ka jinglong jingman baroh bad kumjuh ruh ka jinglong jong ki nongialehkai. Kane kan iarap ruh ban ithuh bad kyntiew ia ki sap na ka thain shatei lammihngi, ki jaka nongkyndong lane ki jaka riewlum.“Kalong ka jingsdang ba kyrpang jong ka jingiaid lynti ka Assam Rifles Public School bad kane ka Khelo India Sports Centre kan kyntiew bad pyntbit ki khynnah shynrang bad kynthei kiba don sap, kiba hadien habud kin wanrah ia ki takma na ki Olympic,” la ong u Rijiju.U Myntri Sorkar Pdeng u la iaroh ruh ia ki jingpyrshang jong u Lt. Gen. Sukhdeep Sangwan, Director-General, Assam Rifles, uba la wanrah bun ki jingkylla kiba bha ha ka skul ha kine ki snem. “Ki kam ialehkai ki ju long ka bynta ba kongsan jong kane ka skul bad kin sa pynmih ia ki nongjop ha ki por ban wan.

Nga dei ban pynpaw ka jingsngewnguh ia u Lt. Gen. Sukhdeep Sangwan uba la wanrah ki jingkylla kiba khraw ha kane ka skul lyngba ki sienjam bapher bapher ba la shim ha kine ki snem. Kane ka Sports School ka long sa kawei ka jingjop jong kane ka skul bad kane kan kyntiew ia ka thong jong u Myntri Rangbah duh ka ri, u Narendra Modi ban pynlong ia ka India kaba khlain ha ki kam ialehkai.”La jied ia ka Assam Rifles Public School kum ka Khelo India Sports School namar ka jingleh bha jong ka ha ka pule puthi bad ki kam ialehkai, ka jingbiang ka jaka sah, ka jingbiang ka jaka ban kyntiew ia ki jingdonkam ba iadei bad ki kam ialehkai bad ka jingkwah ban kyntiew ia ki jingialehkai Olympic hapoh ka jingiatreilang hapdeng ka Tnat kam ialehkai bad ka Tnat kam Pohiing jong ka Sorkar Pdeng. Ki jingialehkai ba la mynjur na ka bynta ka skul kilong ka Archery, Athletics bad Fencing ha kaba ki don 100 ngut ki samla ialehkai ha u snem ba nyngkong.

Haba ai jingiaroh ia ki jingpyrshang jong ka Assam Rifles, u Rijiju u la ong ym tang ba ngi bna ba ka Assam Rifles kalong kaba shlur hynrei ka don ia ka rukom im kaba leh rit bad mynsiem aiti jong ka. U la ong ruh, “Nga thikna ba kano kano kaba don bynta bad ka Assam Rifles kan long kaba jop.Nga ai khublei ia ka longiing baroh jong ka Assam Rifles bad nga kitbok ia u Principal, ki nonghikai jong ka skul bad khamtam eh ki khynnah pule.” U la pynshai ia ki daw jong ka jingbym lah leh bha ka ri ha ka Olympics. U la ong, “Kam dei ba ka India kam don ia ki riew don sap. Ngi don ka lad. Ki don katto katne kiwei pat ki daw. Ka rukom pyrkhat, ka jinglong jong ka sorkar bad kaba kham kongsan ka jinglong jong ka imlang sahlang.” Ki samla mynshuwa kim don lad kamai na ki kam ialehkai. Lait noh katto katne ki jingialehkai, ngim lah ban wanrah ia ki sap. “Ngim lah ban thaw ia ki sap. Ki kam ialehkai kilong ki dustur. Nga sdang ban shimkhia ia ki kam ialehkai bad nga ai khublei ia u Myntri Rangbah duh jong ngi, u Modiji, nga la ioh ban peit ia kane ka tnat bad kumta naduh ka sngi ba nyngkong, nga sngewthuh ba ngi dei ban ialeh tyngeh ban pynlong ia ki kam ialehkai ka dustur,” u la bynrap.

Ka ITBP bad ka Assam Rifles ki la mih shakhmat ban lap ia ki khynnah ba don sap ha ki jaka nongkyndong. Ka Assam Rifles Public School kalong ka jaka ba ngin kyntiew bad pyntbit ia ki khynnah kynthei bad shynrang kiba don sap kiba kwah ban long ki nongjop ha ka pyrthei, u la bynrap. Bad haba ngi don ia ka thong, ka India kan hap ban don hapdeng ki shiphew tylli ki ri ha ka Olympics. U Myntri u la batai ia ka jingpynkhreh jong u na ka bynta ka Olympics bad u la ong, “Haba nga pynbna ba ka India kan don hapdeng ki shiphew tylli ki ri ha ka Olympics 2028, nga la leh katto katne ki jingkhein. Nga la iakren bad katto katne ki briew. Katto katne ki riewshemphang, ki sports manager, bad hadien nga pyndonkam ia la ka jong ka jingshemphang, …ka la sdang naduh u snem 2016.

Ki samla kiba don ka jingtbit ban leit ialehkai ha ka Olympic.ki ioh pisa bad la ai ei ia ki jinghikai pyntbit jong ki. Baroh ki jingdonkam kilong ki bym donkam jingsiew. Ngi la pynbiang lut baroh. Ngi la lah ban ithuh 400 ngut haduh mynta.” Haba ban halor ka jingdonkam ban wanrah ia ki jingdonkam ba iadei bad ki kam ialehkai, u Myntri u la ong ba ki ri kiba rit kiba don ka jingbun briew kaba tang 26 lak ki jop ia ka Olympics. U la ong, “Kadei namar ki samla kynthei lane shynrang ki ieng skhem na ka bynta ka kam kaba dei ha ka por kaba dei. Ki jingai jinghikai pyntbit ki wan kham hadien. Nyngkong phi hap ban ithuh ia u nongjop. Ka jingdonkam ba iadei bad ki kam ialehkai kalong ka jingeh kaba hakhmat. Ki madan ialehkai ki wan kham hadien. Ki jingdonkam ba iadei bad ki kam ialehkai kilong kiba donkam bha. Ka Assam Rifles Public School Sports Centre kan long ka nongrim.

Ngi lah ban wanrah ia ki nongjop nangne. Kaba kham kongsan, ngi dei ban lah ban pynmih kham bun ki nonghikai pyntbit na ka ri. U la pynkut ia ka jingkren jong u da kaba pynthikna ban pynbiang ia ki nonghikai (coach) kiba tbit na ka Sports Authority of India bad yn ai shuh shuh ki jingiarap pisa ban kyntiew ia ki jingdonkam ban iahap katkum ki jinglong ha kiwei kiwei ki ri..

What Next?

Recent Articles

Leave a Reply

Submit Comment

*