Shillong, Naiwieng 08: Ha ka jingiakynduh u myntri rangbah ka jylla Meghalaya u Conrad K Sangma bad ka myntri rangbah duh jong ka Ri Bangladesh ka Sheikh Hasina ha Dhaka ha ka miet sngi palei kila ia kren halor ki lai tylli ki mat, ka Rep ka riang, ka bording ilektrik bad ka kam jngohkai pyrthei.
Ha kane ka jingiakynduh kaba la neh shikynta hapdeng u myntri rangbah ka jylla Meghalaya bad ka myntri rangbah duh jong ka ri Bangladesh, na ka liang jong u Cornad u la pynsngew ba ha Bangladesh ki don ki karkhana pynmih jingbam bad ka jylla Meghalaya ka don ia ki mar rep ia kaba yn lah ban ia khaii pateng.
Haba ia dei bad ka Bording na ka liang jong ka myntri rangbah duh jong ka Bangladesh kala pynpaw ba ka ri Bangladesh ka don kam shibun ka bording ilektrik bad ka jylla Meghalaya ka don ia lad ban pynmih bor ding lada ka don ka jingiatreilang ha kane ka bynta.
Kaba kham kloi bad kaba kham suk ka long ki kam jngohkai pyrthei ha kaba ki briew na kane ka thain kin leit sha Bangladesh bad kum juh na Bangladesh kin wan sha kane ka thain, halor kane kala don ka jingiasoi soskular hapdeng ki Tour Operators na kane ka thain bad kiba na Bangladesh.
Halor kitei ki mat, na ka liang u myntri rangbah ka jylla Meghalaya un sa ia kren bad ka sorkar pdeng, ha kaba kine ki ar tylli ki ri kin sa ia pynbeit kumno ban pyniaid ia ki kam sha khmat ha kane ka jingiatrei lang ban kyntiew ia ka ioh ak kot kane ka thain. Ia kitei ki mat hap ban ia kren bad ka tnad kam poh iing, ka tnad khaii bar ri bad ka tnad kam bar ri jong ka sorkar pdeng.
U myntri rangbah u la kren shai ba ia u soh jong kane ka jingleit jong u sha Bangladesh yn nym lah ban shu iohi noh mynta mynta, kan shimbor namar ba hap ban pynbha ia ki Land Custom Station, ki Iew khappud. Na ka liang jong u myntri rangbah u la ong ba kane ka jingleit ka long kaba seisoh.
