Shillong, Nailur 22: Ka kabinet kaba la long mynta ka sngi kala ai ia ka jingmynjut ban thung ia ki 11 ngut ki Doktor kiba leit pule na lade khlem da shim ia ka bhah jong ka sorkar jylla. Ia kine ki 11 ngut pdiang da ka kabinet mynta ka sngi. Ka jingthung ia ki ka long hapoh jong ka 3F.
Haba kren ha ki nongthoh khubor na ka liang jongu myntri rangbah u Dr Mukul la ong ba ka sorkar ka dap da ka jingkmen ban iohi ba ki don ki samla kiba la leit ban pule doctor khlem da ap ia ka bhah jong ka sorkar, kine ki 11 ngut ki doctor kiba ka kabinet kala pdiang mynta ka sngi ki dei kiba la pyndep ia ka jingpule khlem da ap ia ka bhah jong ka sorkar.
Ha ka juh ka por la iathuh ba hapoh ka tnad ka koit ka khiah jong ka sorkar jylla ki kam doctor kiba lait nalor ba la thung ia kine ki 11 ngut ki dang lait sa 100 tylli. Ka sorkar ka khot iaki doctor kiba la dep ia ka jingpule jong ki ba kin buh ia ki aplikoshon jong ki la ki dei kiba leit pule hi na la de ne kiba la leit ban pule na ka bhah jong ka sorkar.
La ong kumba ka long ka jylla ka don ha pdeng ka jingduna ia ki doctor bad na ka liang jong ka sorkar ka pynshlur ia ki samla pule ba kin leit ban pule ia kane ka kam doctor bad kaba sngew tynnad eh ka long ba kine kiba la pass ia ka kam dcotro ki long kiba la kloi ban trei ha la ka jong ka jylla.
