Shillong, Naiwieng 23: Ka FKJGP Sengkmie hadien shisnem tam ka jingiaid lynti haba iadei bad ka Socio-Econmic movement mynta ka kynti ka la plie paidbah syndon ia ka office treikam jong ka East khasi hills Agriculture Cell ha shnong Mawlyngad kaba la jer kyrteng ia ka “Ka iing U Nongrep” da u bah Ronnie Wahlang (MCS) BDO jong ka Mawryngkneng Block.
Ia kane ka iing u nongrep la plie ha ka sngi palei, ha kaba la wan ban ia shim bynta da ki spah ngut ki Nongrep na ka thain bad ki Shnong bapher bapher jong ka East Khasi Hills Districts, ka jing thmu jong ka Seng ban plie ia kane ka iing U Nongrep ka long hadien ba ka seng ka la ioh ia ka jingujor na ki paid nongrep na kylleng haba iadei bad ka jingeh kaba ki ia kynduh haba hiar dor ki mar rep ban ia nujor bad ka jinglut jingsep ka jong ki kam ia hap shuh.
Ka Seng hadien ka jing leit jurip bad tih bniah ia kane ka long ka daw tynrai ka long dei ba jing bym ia long kawei jong ki paidbah nongrep ha ka por ban leit die ia ki mar rep jong ki kaba pynlong ia ka jingshah shim kabu ha ki nongthied , ka Seng ka shem ruh ba ka jingbym shim khia ka Sorkar lynba ka tnat Agriculture Marketing Board ia kaba ia dei ban buh noh ia ka dor jong ki marep bapher bapher kum ka ‘ Dor die ba thikna” bad ka Seng ruh ka shem ba la donkam ban wan rah ia ka rukom pyrkhat kaba thymmai kat kum ka juk ba mynta ia ka rukom die ne shalan ia kine ki marep na kane ka jylla.
Ka seng lyngba kane ka iing kan lum kan lang ia ki paidbah nongrep bad btin lynti ia ki nangne sha khmat bad kane ka iing long kum ka Model project jong ka Seng bad lada kane ka jingthmu long ka ba sei soh ka seng ka sa pyn pur pat sha kiwei ki districts .
Ha kane ka jingialang la ia don ryngkat lang naduh ki Sordar shnong jong ki shnong bapher bad ki nongialam jong ka FKJGP Sengkmie bad ki nongialam jong ki district bad ki circle bapher bapher, ha kane ka jingialang la ioh ka jingkren U Sordar jong ka Mawlyngad bah E.Kharbihkhiew, bah Marco Mitri Associate Professor UCC, Samla Daniel Ramsiej field supervisor Citizen foundation ,bah Generous Warlarpih Vice–President KJBWA.
Ki nongialam ka seng kmie kiba la ia don lang ki long ubah Dundee Cliff Khongsit General Secretary ,bah Wellbirth Rani President jong ka Seng uba long u Symbud Kongsan ia kaba u la kyntu ia ki paidbah nongrep ba kim dei ban duh mynsiem ne duh jing kyrmen ka Seng ka don rynkat bad ki ha kino ki liang haba iadei ban kyntiew ia ki kam rep ka jong ki , bad la ioh ruh ka jingkren na u bah Ronnie Wahlang uba long u Kongsan ia kaba u la pynpaw ka jing sngew kmen ban iohi ia kane ka jingshim khia jong ka Seng ban kyntiew ia ki paidbah nongrep da kaba plie syndon ia ka iing u nongrep.
U kyntu ia ki paidbah nongrep ban shim ia kane ka kabu ba la wan rah da ka seng FKJGP bad kumno ma ki ruh ki dei ban shim khia ia kam kaba ki trei bad u la kular ruh ba na ka liang jong ka Block office jong ka mawrynkneng kan ai ia ka jing kyrshan ba rad bah ia kane ka jingthmu babha ka Seng bad ma u ruh u ai ka jing shakri kaba paka kat kum ka bor ba la byn shet ha u bad u la kyntu ruh ia ki self help group bapher bapher jong katei ka thain ba kin long kiba trei shitom bad trei hok ia ka kam lada ki kwah ban ioh ia ka jing jop ha ka jingthmu jong ki.
