Shillong, Nailur 25: Ka KHNAM State Youth Wing lyngba ka RTI ka la ioh jingtip ba haka ophis jong ka Directorate of Land Records and Survey jong ka sorkar jylla ka don bun tylli ki kam kiba la shu lait ei kiba kynthup, Kawei ka post Assistant Director of Land Records, Ar tylli ki posts Assistant Director (Gazetted) of Survey, Kawei ka post stenographer, Kawei ka post Duftry, Ar tylli ki post Grade IV.
Nalor jong kitei ki kam kiba lait ki long, Lai tylli ki post Draftsman, Kawei ka post Printing supervisor, Kawei ka post Zinc Correction Grade II, Kawei ka post Printer Grade II, Lai tylli ki post Grainer Grade II, Kawei ka post Opreator, Kawei ka post Developer, Kawei ka post Typist, Kawei ka post Head Computer, Kawei ka post Computor Grade II, Kawei ka post Traverser Grade I, Saw Tylli ki post Traverser Grade II, Kawei ka post Traverser Grade III, Hynriew tylli ki post Plain Table Surveyor, Bad Shispah ar (102) tylli ki post Khalasi.
Ia ka jingbym lah ban pyndap ia kine ki post ba thylli jong katei ka department la batai ba ka daw kadei ba khlem pat lah ban approve ia ka Service Rules da ka Sorkar Jylla bad haka ba iadei ba ka jinglait thylli jong ki 102 tylli ki post Khalasi ka daw la batai ba ka sorkar jylla ka la bthah lyngba ka notification jong ka ha u snem 2010.
Ka sorkar jylla, ki myntri bad ki MLA ki la juh pyrta bad pynsngew ia ka jingkhie roi jong ki samla kyrduh kam kyrduh jam haka jylla, ki la kyntu ia ki samla ban ieng ha la ki jong ki kjat, hynrei kane ka jinglap RTI jong ka seng ka kdew ba ka Sorkar, ki myntri bad ki MLA ki kyllut, ki matlah bad kim lait ban kren ia kane ka bynta, ha kawei ka liang ki kyntu ia ki samla ban ieng ha la ki ong ki kjat hynrei ha kawei pat ka liang ki kdiah ia ki kjat jong ki samla da kaba khanglad ia ki ban ioh kam ioh jam.
Ka jingbym ioh kam ioh jam jong ki samla ka noh synniang ia ka jingkhie roi jong u Drug, ka kiad, ki kam die met bad kiwei kiwei ki kam sniew ha ka jylla. Ka long kaba eh pyn kohnguh ia ki samla “ba ka pule ka puthi kadei ka lynti sha ka jingsuk, lada sawdong jong ngi la iohi ba ki samla ki ba lanang la stad ki duk bad ki ba dakaid ki riewspah“(it’s difficult to convince the youth that education is the key to success when we are surrounded by poor graduates and rich criminals).
Ia kine ki post baroh dei ban khot interview kat kum ka lynti ka hok, ym ba kin long ki backdoor seats jong ki nongmihkhmat ban jop election. Ka seng ka kyntu jur ba ka Sorkar Jylla kan khot interview mardor ia kine ki post ba la lait, bad ruh ia ki post ba la lait ha kiwei pat ki department, shwa ba u budlum ka jaitbynriew (samla) un tlot, un swai. Ka seng kan phah ia ka dorkhat ryngkat ki copy jong ka RTI sha ka office jong u Myntri Rangbah ka jylla la ong ka KHNAM.
