Shillong, Lber 22: U syiem jong ka Hima Nongkhlaw u Pa’im Phrestar Syiemlieh jong ka hima Nongkhlaw u la phah ia u Deputy Syiem u bah KM Syiemlieh bad lai ngut ki myntri, u Bah B L Nongbri, Bah L Basaiawmoit bad bah BL Nongum ba kin leit ban jurip ia u pud u sam jong ka hima ha khappud bad ka jylla ha Assam, namar kala don ka jingwan tam pud jong ki briew katei ka jylla da kaba wan rep hapoh jong u pud u sam jong ka hima Nongkhlaw.
Ha kane ka jingleit jong kine ki heh ka hima Nongkhlaw ha ka 21 tarik mynta u bnai, kila lap ba kala don ka jingkyntur pud da ki briew jong ka jylla Assam kiba dei na ka shnong Barigoan, kiba la wan ban dkhol ia ki jaka jong ka hima Nongkhlaw da kaba wan rep wan riang bad ki jaka kiba la shah dakhol ki hap ha u pud u sam jong ka jingpeit jong ka shnong Raja Khomai, Belahari, Raja Bala kidei ki shnong jong ka Hima Nongkhlaw.
Ha kane ka sngi na ka liang jong u Dy Syiem jong ka hima bad ki myntri ki khot hajir u Goanbura jong ka shong Barigoan ban tohkit na u halor kane ka jingwan tam pud da kaba wan rep. na ka liang jong u tei u nongpyniaid shnong ka jylla Assam u la ong ba kum u Goanbura jong ka shnong um shym la ai jingbit iano iano ruh ba kine leh ia kane ka kam ban rep ban riang hapoh u pud u sam jong ka Hima Nongkhlaw, kiba leh ia kane kila leh da la ka jong ka mon khlem jingtip jong u kum u nongpyniaid shnong.
Na ka liang jong u Goanbura u la ong ha khmat jong u Dy Syiem bad ki myntri jong ka hima nongkhlaw ba nangne sha khmat un ong ia la ki paidbah nongshnong shnong ka Barigoan ba kimd ei ban ban kyntur pud, ha ka juh ka por kito ki briew kiba la wan rep hapoh u pud u sam jong ka hima Nongkhlaw kila pan map bad kila ai ka jingkular ba nang ne sha khmat kin nym wan kyntur jaka shuh ban rep ha u pud u sam jong ka hima Nongkhlaw.
Khang ban nym sah shrah kine ki jaka naka liang jong u Syiem bad ki myntri kila ai bor ia ki trai shnong kiba dei na Raja Khomai, Raja Bala, Belahari bad ka shnong Mawdem ba kin leit ban rep ban riang ha kitei ki jaka ha u pud u sam jong ka shong ka thaw ka jong ki khnang ba ki briew jong ka jylla Assam kin nym ioh lad ban wan skut jaka bad ban wan kam ei, namar lada shuieh shrah ki jaka jong ka hima kin sa shah klun ei ha ki briew na katei ka jylla kumba la jia ha kiwei kiwei ki bynta jong ka jylla Meghalaya.
Ha katei ka jingleit na ka liang jong ki myntri kila pom pynkhyllem noh ia ki deing kiba la wan ban thung da ki briew na ka jylla Assam hapoh u pud u sam jong ka hima Nongkhlaw bad kane ka jingpom ia ki dieng ka long ban pyni sha ki briew kiba na ka jylla Assam kiba la sdang ban wan kyntur pud ba ka hima kan nym ai lad da lei lei ba kin wan tur hapoh u pud u sam jong ka hima la ong ruh ia ki briew na katei ka jylla Assam ba kim dei ban pynsier pynsmiej ia ki briew jong ka hima kiba shong ba sah ha katei ka thain.
