Shillong, Kyllalyngkot 20: Ka jylla Meghalaya la shai ka sngi kan dap 47 snem jong ka jingioh jylla ba pura. Ia ka jingrakhe ia kane ka sngi sah kynmaw ba dei ha kum kane ka sngi ba ka jylla Meghalaya kala ioh la ka jong ka jylla da kaba phiah na ka jylla Assam ka sorkar kan pynlong ia ka jingrakhe la shai ka sngi ha Soso Tham Auditorium Shillong.
Ka long kaei kaei kaba ki paidbah kim lah ban pdiang ia ka jingioh ia ka jylla namar ba ka jylla kala kynjah sha ka 47 snem, hynrei ka jingeh kaba ka jylla ka iakynduh ka dei ka jingbym lah ban pynbeit ia u pud u sam ba ka jylla Assam, ka sorkar kala dei ban pynrkhar thymmai ban pdiang noh ia ka jingiashim ia ai ban ia pynbeit ia u pud u sam ba ka jylla Assam.
Haba peit ha kine ki 47 snem ka jylla Meghalaya ka dang sah dien ha bun ki liang, wat la ki dak ki shin ha ka liang ka roi ka par kila sdang ban paw khatam ha ki surok, ki jaka ai jingsumar bad ha ka pule puthi ha kaba ki College kila don ha baroh ki District ha kane ka jylla.
Wat la ka jylla kala ioh ia ka burom ba ka dei ka jylla kaba rit kaba la kiew ha ka rep ka riang, hynrei ka jylla ka dang sah dien bha ha ka liang jong ka rep ka riang namar ia ki marrep kiba na kane ka jylla haduh mynta ym shym la lah ban kyntiew, kum ka kam rep phan, ka rep soh, Syieng kaba ki briew kane ka jylla ki rep bha ia ki. Kine ki dei ki jingrep kaba ki paidbah kane ka jylla ki la rep naduh ki por shuwa ban ioh ia la ka jong ka jylla.
Haba phai ha ka liang ka ioh kam ioh jam, bun na ki samla kane ka jylla kila hap ban mih na ka jylla ban leit wad kam sha bar jong ka jylla namar ka jingbym don ia ki karkhana kiba lah ban ai kam namar tang ka kam saorkar yn nym lah shuh ban ai kam ia ki samla pule ka jylla.
Ka jingeh ia ki sorkar kiba la leit noh ia kane ka sorkar kaba mynta bad kum juh ia ki sorkar ki ban dang wan kan dei ka ioh kam ioh kam na ka bynta ki samla kiba la don ka jingnang jingstad. Kane ka dei ka phang ba ka sorkar ka hap ban pyrkhat ym tang ba ki samla kin ioh kam sorkar hynrei wat ha kiwei kiwei ki kam kiba dei sha bar jong ka sorkar.
Ka jylla Meghalaya ka don ia ka lad ban pynlong ia ka rep ka riang kum kawei na ki lad ai kam ia ki samla, ka ri jingri bad ba ka sorkar ka dei ban shim khia ban pynbha ia ki kad khaii bad ka Bangladesh namar ka iew ia kane ka jylla Meghalaya kan long ka Bangladesh ban shallan ia ki mar kiba mih na kane ka jylla. Ka jingrakhe ia ka jingdap ka jylla 47 snem la shai ka sngi kan long kaba jop lada ka sorkar kan wanrah ia ki mat trei kam kumno ban weng ia kane ka jingkyrduh kam ha ka jylla.
