Shillong, Lber 04: Mynta ka miet kala don ka jingiakynduh ha iing jong u Dr Donkupar Roy president ka UDP na ki seng sain pyrthei kiba la jop ha kane ka MDC ilekshon kiba don ha ka kynhun sorkar Meghalaya Democratic Alliance.
Ha kane ka jingiakynduh la thaw ia ka United Democratic Alliance (UDA) bad ha kane ka jingakynduh lang ki MDC kila jied ia u Bah Teinwell Dkhar jong ka UDP ban long u kyrtong CEM bad ia u bah Pynshngianglang Syiem ban long u kyrtong Chairman hapoh jong ka KHADC.
Ha kane kane ka jingiakynduh kaba mynta ka sngi na ka liang jong ka NPP la lamkhmat da u Bah Prestone Tynsong ba dei symbut myntri rangbah ka jylla, na ka UDP la lam khmat da u president ka party u Dr Donkupar, ha kaba la don lang u bah Renikton Tongkhar na ka HSPDP bad ki dkhot shimet u Bah Latiplang Kharkongor, bah Lambor Malngiang.
Haba kren ha ki lad pathai khubor ha dien ba la wai ka jingialang, u Chairman jong ka UDA u ba long ruh u kyrtong CEM u Bah Teinwell Dkhar, u la iathuh ba ha dien ka jingiakynduh lang bad ka NPP mynta ka miet la shim ia ka rai ban thaw ia ka UDA bad ha kane ka jingiakren kiba bun ki para dkhot kila shim ia ka kyrteng jong u Bah PN Syiem ban long u kyrtong Chairman hapoh jong ka KHADC.
La iathuh ba baroh ki MDC ha kane ka kynhun UDA ki don 19 ngut, ka UDP ka don 6 ngut, HSPDP 2 ngut, PDF 1 bad lai ngut ki Independent bad ka NPP 7 ngut. Kine baroh 19 ngut kila rai ban thaw ia ka UDA bad kila ia kular ban pynneh ia ka EC ha duh bakut jong ka san snem.
