Shillong, Naiwieng 07:U Bah Hopingstone Masharing ula pynpaw ia ka jingdiaw halor ka jingleh klet ka Khasi Hills Autonamost District Council (KHADC) ban kynmaw burom ia ka lyngkhuh sngi iap u Rev JJM Nichol Roy ba la tip kum u kpa jong ka ‘Sixth Schedule’ ha ka riti synshar ka Ri India na bynta ban iada ia ki jaidbynriew rit paid ha ka thain lammihngi.
Haba iakren bad u Nongthoh khubor (Bah Hoping) une u riew rangbah ba la iakhun teng ia ka elekshon MLA ula ong, ka District Council kam shym la leh burom ia utei u rangbah ha ka 1 tarik Naiwieng, 2017 ne buh syntiew ha ka dur mot ha phyllaw ophis KHADC hynrei ka la khang tang ka ophis khlem ban pyndep rukom kumjuh ki hima kum ka Mylliem bad kiwei ki khang ka ophis hynrei ym ba kynmaw ban leh burom.
“Ka sorkar India ka niew burom ia une u rangbah bad ka la thaw ki stam ban ai nam ia u, katba ki District Council ha ka jylla ka KHADC, JHADC bad GHADC kim la shym la leh burom ha katei ka sngi,” ula ong bad bynrap ba katei ka jingleh ka pyni ba ngim burom ia utei u riew khraw uba la mihkhmat ban iada ia ka jaidbynriew Khasi-Pnar.
Kum u nongialam u Bah Joy ula noh synniang shibun haka kam sain hima sima ban iasaid na bynta ka ri bad jaidbynriew bad kumjuh ha ka kam u Blei, ula ong bad ngi dei ban kynmaw burom ia une u riew khraw ia ka sngi kha bad sngi iap jong u man u snem, ka sngi kha ka dei ha ka 12 tarik Jylliew,1884 bad ka sngi iap ha ka 1 tarik Naiwieng, 1959.
