Shillong, Nailar 31: Ka Dorbar u Syiem ka Hima Sohra mynta ka sngi kila ia kynduh ia Deputy Commissioner jong ka East Khasi Hills District ka kong Isawanda Laloo halor ka jingshah biang ka sorkar ban plie ia ki jngohkai pyrthei ha kane ka jylla.
U Bah B V Rymbai Secretary jong ka dorbar haba kren ha ki lat pathai khubor u la ong ba, kane ka jingia kynduh ka long ban kyntu na ka sorkar ban ai bor ia ki nongialam hima ban lah ban pyrkhing ia ka jingwan ki nongwan jngohkai pyrthei sha Sohra ban teh lakam ia ka khlam COVID-19.
Ha kane ka jingiakynduh na ka liang jong ka Hima kala pan ia ka bor na ki bor jong ka District Administration ba kin ai ka jingithuh khnang ba kin lah ban buh da ka khyrdop shuwa ba ki nongwan kai kin rung sha Sohra namar kum ka hima ka kwah ban ia treilang bad ka sorkar.
U Bah Rymbai u la ong ba lada ka don ka jingthoh kyrteng ia ki briew kim tip katno ngut kiba sah bad katno ngut kiba ban leit phai bad ban tip ka kiba wan dei kiba la dep ban test ne em, ha ka juh ka por kin nym ailad ia ki nongwan kai ban bret pathar ia ki jaboh ha katei ka thain.
Lada ioh ia ka jingbit ban buh ia ka khyrdop kum ka hima kin ai ia ki plastik ia ki nongwan jngohkai pyrthei ba kin thep ia ki jaboh bad da kila wan phai kin ap ia ki jaboh ba kin leit ban bret na ka liang ka hima, kane ka long ban pynlait na ka jingjakhlia, la ong u bah Rymbai.
U Secretary ka dorbar hima u la ong ba ka sorkar bun sien ka nang tang ban buh ia ki ain khynrei kam nongban bud dien dei halor kane ba ka Hima Sohra ka kwah ban ia kren bad ka sorkar, ka sorkar ka dei ban ai ia ka jingthuh namar ka sorkar kan nym lah ban bud dien.
Ha kane ka jingiakynduh bad ka DC la bthah ia ki nongialam ba kin ia kynduh ia u SDO Civiljong ka Sohra ban ia skhim khia lang, la ong ba lada ka sorkar kam ai bor kumno kin nym ban kren ia ki nongwan jngohkai pyrthei, la ban biang u bah Rymbai.
La ong ba kum ka hima ka angnud ban ia trei lang ba ka sorkar, hynrei lada ka sorkar kam treh ban ia treilang, kam dei tang ba kin ioh ia ka kamai hynrei kaba kongsan ka dei ka koit ka khiah kaba kongsan eh la ong u bah Rymbai.
