Shillong, Rymphang 24: U Chief Executive Member (CEM) jong ka KHADC u Bah PN Syiem ryngkat bad kiwei ki para MDC na ka kynhun jong ka People Democratic Forum (PDF) mynta ka sngi kila leit ban ia kynduh ia u Lat jong ka jylla u Banwanrilal Puhorhit ha Raj Bhavan.
U Bah PN Syiem ha dien ka jingiakynduh ia u Lat, u la ong ba kane ka jingwan ia kynduh ka long ka jingwan ai khublei ia u ha dien ba u la wan ban shimti kum u Lat jong ka jylla, kane ka jingiakynduh ka long ban ai khublei ia u na ka liang jong ka Council hapoh jong ka KHADC.
Ha kane ka jingiakynduh la iakren ruh halor ki bills kiba dang sah ia kiba la pass da ka iing dorbar jong ka KHADC ia kiba dang sah teng haduh kine ki sngi, bad kiwei kiwei ki kam kum ka kam EM kaba dang sah teng.
La iathuh ba ha kane ka jingiakren na ka liang jong u Lat u la pynsngew ba un sa ia kren bad ka sorkar ban sngewthuh kham bniah namar ba u dang shu shimti ia kane ka kam. Ha kane ka jingleit ia kynduh la don lang ki EM bad kum juh ki para MDC kiba ia don lang ha ka PDF.
