Shillong, Nailur 08: Ka kynhun Meghalaya State Kickboxing Association (MSKA) kala pynthikna ba samla Ibadarishisha Mukhim na Lumparing Dongsiej bad u samla Nathaniel Pynbianglang Kurkalang na Mylliem Mawri, kin mih na Shillong ha ka 12 tarik mynta u bnai ban leit ban ia shim bynta ha ka jingialehkai Kickboxing Championship 2018 ka ban long ha Italy.
Kine ki ar ngut na kane ka jylla Meghalaya kin mihkhmat ia ka Ri India ha kane ka jingialehkai kaban sdang haka 15 tarik bad kan kut haka 23 tarik mynta u bnai ha Jesolo Lido, Venice jong ka Ri Italy. Ka jingshah jied jong kine ki ar ngut sha kane ka lympung ia kura jong ka pyrthei ka long ha dien ba kila dep ban shah jied na Raipur bad Delhi ha ka jingialehkai jongka National Kickboxing and Federation Cup.
Na ka liang jong ka seng kala pyntip ruh ba lada ki paidbah ki kwah ban ai ka jingkhublei kitbok ia kine ki ar ngut ki nongiakura na kane ka jylla ki ban mih khmat ia ka Ri India ka seng kala pynbeit ha ka 11 tarik mynta u bnai naduh ka por 3.30 baje noh sngi haduh ka por 6.00 baje jan miet.
Haka juh ka por la pyntip ruh ba ia ka ‘1st Meghalaya State Level Kickboxing Championship bad ka 3rd State Level Kickboxing Selection Trial 2018’ ynsa pynlong ha Shillong ha ka 27 tarik haduh ka 25 tarik mynta u bnai kum ka jingpynkhreh ban ia shim bynta ha WAKO India National Kickboxing Championship 2018 ka ban sa long ha Kolkatta ha u Naiwieng.
