Leit iakynduh ka KSU ia ka MZP-YMA ban ia pynbeit ki jingeh ki khasi ba sah ha Mizoram

Shillong, Lber 14: Ka Khasi Students’ Union (KSU) ka la hiar sha ka nongbah Aizawl jong ka jylla Mizoram ban ia kynduh kyrpang ia ki nongialam ka Mizo Zirlai Pawl khnang ban ioh ban pynbeit ia ki jingeh ba ki paid Khasi ba shong shnong ha Khasi Veng, Vairangte, Kolasib district, Mizoram ki ia kynduh.

Kum ban shu pynkynmaw ka seng ha u snem 2008 ka la ia pynbeit bad poi sha ka jingiasngewthuh bad ka MZP central body lem bad ka Young Mizo Association (YMA) Shillong halor ka jingshah thombor ki paid Khasi ha Vairangte ha kaba ki la shah pynjulor la ki bri tympew ha kiwei pat ki jaidbynriew.

Ha une u snem la dawa ruh ba dei ban ai kot jaka lane kita ki Land Holding Certificates (LHC) ia baroh ki longiing Khasi ki ba sah ha Mizoram. Hadien 11 snem jong kane ka jingiapynbeit la shem ba na ka liang ka sorkar Mizoram kam shym la ai ia ki LHC sha kitei ki paid Khasi bad kane ka la pynlong ia ka KSU ba kan hiar mardor sha Mizoram ban pynbeit ia kane ka jingeh ha kaba ka seng ka sngew ba ki paid Khasi ki long kumba shong ha shynrong wat lada ki don la ki jaka ki puta namar ka sorkar Mizoram ka khein nongwei sah ia ki.

Ha ka meeting ba la pynlong ha ka MZP general headquarters office la wanrah ia kane ka mat ha kaba la wanrah ia shibun tylli ki daw ba balei ki Khasi ha Vairangte ki don hok ban ioh ia ki LHC. Na ka liang u samla Donald V Thabah u la iatai ba namar ba ki Khasi ki la shong shnong ha Vairangte naduh u 1936 ha shwa ban pynkha ia ka jylla Mizoram bad shwa ban ioh laitluid ka ri India kumta ki la don hok ban long ki nongshong shnong ba pura jong ka Mizoram bad ia kane lah ban pynurlong lada ka sorkar Mizoram ka ai ia ki LHC kiba dei ki sakhi longtrai ia la ka khyndew ka shyiap.

Shuh shuh une u samla u la ong ruh ba ki paid Khasi ha Vairangte ki don tang 70 long iing bad kam ju don kano kano ka jingwan buhai shnong na ki paid Khasi kiba sah ha Barak Valley, Assam bad Meghalaya sha ka jylla Mizoram kaba lah ban ktah ia ka jingheh paid ki Jaidbynriew Mizo. Kumta u la kyntu ia ka MZP ba kan ailad bad iarap ia kine ki paid Khasi ba kin ioh noh ia ka hok kaba ki la angnud da ki phew phew snem.

Na ka liang ka MZP ruh kum shi bynta ban pynneh bad pynskhem shuh shuh ia ka jingiatehlok bad ma KSU ki la rai ba kin ym pyrshah da leilei lada ki Khasi na Vairangte ki leit ban pan ia ki kot ki sla jaka. Shuh shuh ka MZP ka la kular ruh ba ha kine ki sngi kan sa leit ia kynduh kyrpang ia u Land Revenue Minister jong ka jylla Mizoram ban kyntu ia u ban ai noh mardor ia ki LHC sha baroh 70 tylli ki longiing Khasi ha Khasi Veng, Vairangte.

Ka KSU halor kane ka jingkular ka MZP ka la ai khublei kyrpang ia kine ki nongialam ka MZP kiba kloi ban iarap ia ki paid Khasi ba shem lanot ha Vairangte khamtam ia u samla Ricky Colney Lalbiakmawia u ba dei u Advisor ka MZP bad ha kajuh ka por uba bat kum u Finance Secretary ka NESO.

Kiba mihkhmat na ka KSU ki kynthup ia u samla Donald V Thabah General Secretary, , Rapborlang Nongrum Publicity Secretary, KSU, Pynkmenlang Sanmiet President, KSU NEHU Unit, samla Pynshai Kupar Dkhar General Secretary, KSU NEHU Unit bad kiwei kiwei. Katba ia ka MZP pat la mihkhmat da u Ricky C. Lalbiakmawia (Advisor), L. Ramdinliana Renthlei President, B. Vanlaltana Vice President), Lalnunmawia Pautu (General Secretary), Lalthianghlima (Assistant General Secretary), Michael Lalramsanga (Treasurer) bad u Andrew F. Lalramnghaka (Finance Secretary).

Hadien ba la wai kane ka jingialang ka KSU ka la hiar noh sha Khasi Veng, Vairengte kaba don ha khappud Assam bad Mizoram ha kaba la ioh ban pynthymmai ia ki nongkitkam ka KSU Vairangte Circle. La pyntian smai ia kine ki nongkitkam ba thymmai katei ka tnad treikam da u samla Donald V Thabah hapdeng ka jingsakhi jong baroh ki nongshong shong ka Khasi Veng, Vairangte.

 

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet