Leit jngoh kynsan u Conrad ia ka jingtei ia ka iing dorbar thawain ka jylla ha Mawdiangdiang

Shillong, Jylliew 13: U Myntri Rangbah ka jylla u Conrad K Sangma mynta ka sngi u la leit jngoh kynsan ia ka jingtei ia ka iing dorbar thawain ka jylla kaba dang tei thymmai ha Mawdiangdiang ban iohi ka jingtrei kala long haduh katno ka kam kala iaid.

Ha ka jingleit u myntri rangbah u la shem ba ka kam kala iaid sha khmat bad u sngew kmen ba iohi ba kane ka jingtrei kaba ka jylla kala khmih lynti la slem kala iaid beit ha ka jingtei ia kane ka iing dorbar jong ka jylla.

Ban shu kdew ba ka jingthmu ban pyndep ia kane ka iing dorbar kaba la tei ha Mawdiangdiang ka dei ban pyndep ha u snem 2022 bad ka don ka jingkyrmen ba ka sien shong dorbar kaba khatduh jong kane ka iing dorbar ba mynta kan long ha kane ka iing dorbar kaba thymmai.

Ka iing dorbar ba rim jong ka jylla kaba don ha Khyndailad kala pluh ha u snem 2001 bad ka jingtei ia ka iing dorbar kaba thymmai kala sahteng khlem lah ban sdang ha la bun bun snem dei ha kane ka sorkar kaba la ialam da u Conrad la lah ban sdang ia ka jingpyntrei ia kane ka iing dorbar kaba thymmai jong ka jylla ha dien ba kala pluh.