Shillong, Lber 01: U Chief Executive Member (CEM) jong ka Khasi Hills Autonomous District Council mynta ka sngi u la leit ban sngewlem na ka bynta kito kiba la mynsaw ha ka jingkylla kali ha ka step sngi u blei ha kaba la jia ha jan ka shnong Nongspung ha kaba 17 ngut ki mynsiem briew kila duh ei ia la ka jong ka jingim bad 62 ngut kila mynsaw.
Na ka liang jong u CEM u la leit ban jngoh ia baroh kito kiba shitom na kane ka kylla kali kiba dang shah sumar mynta hapoh jong ka Nongstoin Civil Hospital bad ha dien ba la wan poi sha Shillong u la leit ban jngoh ruh ia kito kiba la wan kit sha Shillong Civil Hospital kiba dang shah sumar mynta.
Na ka liang jong u CEM, ha kane ka jingleit jngoh u la ia kren bad kito kiba dang don mynta ha pdeng ka jingshah sumar bad u la kitbok ia ki ba kin ioh noh ia ka jingkoit jingkhiah bad ha ka por ba u don sha Nongstoin u la leit ban jngoh ia ka jaka ba ka don ka jingjia ba sngewsih.
