Shillong, Lber 15: Ka myntri ba dei peit ia ka tnat ka koitd ka khiah jong ka sorkar jylla ka kong Ampareen Lyngdoh, mynta ka sngi ka la leit ban jurip ia ka jaka ai jingsumar ia kiba pang bampong ha Civil Hospital Shillong kaba la tip kum ka Cancers wing.
Ha kane ka jingleit jurip la synran lang ia ka myntri da ki ophisar ka tand ka koit ka khiah bad ki doktor bad ha dien ka jingleit jurip kala khot ia ka jingialang bad ki ophisar ban sngewthuh kham bha ia katei ka jaka sumar.
Haba kren ha ki lat pathai khubor “Ka jingpang cancer ka dei kawei na ki jingpang ba shim bun ia ka jingim jong ki briew ha ka jylla Meghalaya” Ba ruh na ka liang jong ka sorkar jylla ruh ka la iaid shakhmat ban shim ia ki lad ki lynti kiba kongsan khnang ban lah ban tehlakam ia kane ka jingpang kaba ma bad kynrei bha ha ka Jylla, khamtam ha East Khasi Hills District.
Ka kong Ampareen ka la ong ruh ba na ka liang ka tnad ka koit ka khiah, kan sdang noh ban leh ia ki jingpynshai paidbah ha kaba ia dei bad kane ka jingpang sha ki paidbah khamtam eh ia ki khynnah skul ban pynsngewthuh ia kane ka jingpang kaba la shim bun ki mynsiem briew.
