Shillong, Naiwieng 29: U myntri rangbah jong ka jylla u Dr Mukul Sangma mynta ka sngi la leit ban jurip ia ka jaka
ban pynlong ia ka jingiaseng Syond jong ka KJP Synod Mihngi 2018 ka ban long ha Lum Sawai ha Tynring.
Ha kane ka jingleit jurip jong u myntri rangbah ia kane ka jaka ban pynlong ia ka jingiaseng, u la bethah ia baroh ki tnad sorkar kiba ia dei bad kane ka kam ba kin leh ia kaba don kam bad kin pyndep ia ki jingtrei baroh ha ka por ba la buh namar ka jingiaseng kan long ha u bnai Lber 2018.
Na ka liang jong u myntri rangbah u la pynpaw ia ka jingsngew kmen ka jong u ban iohi ba ka jaka ban pynlong ia kane ka jingiaseng kaba heh jong ka KJP Synod Mihngi ka long kaba paka. Na ka liang jong u myntri rangbah ha kane ka sngi u la ai ka jingkular ha khmat jong ki nongialam balang ba ka sorkar kan kner ia la ki kti ban iarap ia kaba don kam.
Ha kane ka sngi kiba la ia don ki long ki heh na ka tnad PWD, PHE bad ka MeECL, u bah David Nongrum MLA jong kane ka jaka, u DC u Bah PS Dkhar ruh ki la ia don lang ha kane ka sngi . Ki Pastors na ka KJP Synod Mihngni, Laithumkhrah Presbytery bad ki dkhot jong ka Dorbar Shnong, Tynring ruh kila ia don lang.
