Mairang , Naitung 18: Kum ka jingburom ia u nongialeh laitluid na ka jingsynshar donbor ki phareng u Tirot Sing Syiem u syiem jong ka Hima Nongkhlaw ka sorkar pdeng kala bei pisa T.12.86 klur tyngka ban tei ia ka iew ha Mairang ia kaba la ai kyrteng “U Tirot Sing Market Complex” Mairang kaba hap hapoh jong ka West Khasi Hills District.
Ka jingbei pisa jong ka sorkar pdeng ban tei ia kane ka iew ha ka kyrteng jong u khlawait ka Ri Khasi u wei na ki nongialeh laitluit ka long ban pynsah ia ka nam ka burom jong u tei u riew khraw u ba la khlad ha ka kti jong ki pahreng. Ia kane ka pisa la bei lyngba ka Ministry DoNER.
U President jong ka party BJP Meghalaya State Unit ha ka lyngkhuh sngi iap ba 185 snem jong u Tirot Sing u la leit ban jurip ia kane ka Iew kaba la pyntrei mynta ha Iew Langstieh ha Mairang, ia ka bynta kaba nyngkong, kane ka iew kan don lai bynta bad ka jingtrei ka dang iaid sha khmat.
Ha kane ka jingleit jurip u Bah Mawri u la ing ba kane ka jingleit ban jurip ka long ban peit la ka jingtrei kala iaid haduh katno namar ka sorkar BJP hapoh ka jingialam jong u Myntri Rangbah duh jong ka ka Ri India u Narendra Modi u angnud ba ki jingtrei baroh ki dei ban dep ha ka por ka biang.
Ha kane ka jingleit jurip na ka liang jong u President ka BJP Meghalaya State Unit u la ong ba u da sngewkmen ban iohi ba ka jingtrei kala iaid beit bad ka bynta kaba nyngkong kala jan dep bad ha kane ka jingleit u la ai ka jingkular ba lada don kano kano ka jingeh u kloi ban iarap ban peit ba kan nym don ka jignthut ha kaba pyntrei ia kane ka kam.
Ka sorkar pdeng kala ibit ban pynneh pynsah ia ka nam jong u Tirot Sing Syiem da kaba ai ia kane ka Iew ha ka kyrteng jong u bad ia kane la leh ha dien ba u myntri ka sorkar pdeng u Dr Jitendra Singh u la wan da lade sha Nongkhlaw ban burom ia une u nongialeh laitluid jong ka Ri.
Ha kane ka sngi la don u Syiem Khynnah ka Hima Nongkhlaw u syiem K M Syiem ki myntri jong ka Hima na ka liang jong u Syiem khynnah u la ai khublei ia u Myntri Rangbah Duh jong kane Ri India u ba la ai ia kane ka Iew hapoh ka Hima Nongkhlaw bad ka jingkhublei ia u President ka BJP u Bah Ernest Mawri u la ban wan jurip da lade ia ka jingiaid ka jingtrei jong kane ka Iew.
Ha kane ka sngi la don lang ruh na ka liang jong ki ophisar ba dei na ka NERCORMP ka tnad jong ka sorkar pdeng kaba pyntrei ia kane ka iew. Ha ka jingshisha ia kane ka iew la dep ban pyndep ha u Nohprah mynta u snem hynrei na ka daw jong kane ka COVID-19 la buh ban pyndep ia ka ha u bnai Lber 2021 ia ka bynta kaba nyngkong.
