Shillong, Kyllalyngkot 29: Mynta ka sngi ka kynhun jong ka United Democratic Alliance (UDA) hapoh ka jingialam jong u bah Pyniaid Sing Syiem kala leit ban ia kynduh ia u lat jong ka jylla u Tathagata Roy ban pyntip ba ki don 16 ngut ki MDC ha ka iing dorbar kaba 29 ngut.
Haba kren ha u SP News Agency u bah Pyniaid u la ong ba ha kane ka jingiakynduh kila ai ia ka list jong ki 16 ngut ki MDC ba don ha ka kynhun UDA bad ha ka jingiakynduh kila kyrpad ia u Lat ka jylla ba un bishar bniah ia kane.
La iathuh ba na ka liang jong u Lat ka jylla u la ong ba un sa da bishar bniah ia kane ka kam wat la kala don ka rai jong ka iing bishar jong ka High Court jong ka jylla Meghalaya.
Ha kane ka jingleit ia kynduh ia u Lat jong ka jylla na ka liang jong ka Kong Grace Mary Kharpuri kala ai da ka jingthoh sha u Lat ka jylla ban pyntip ba kala mih na ka kynhun United Democratic Forum (UDF) bad kala pyniasoh bad ka United Democratic Alliance (UDA).
Ha kane ka juh ka shithi kala kyrpad ia u Lat jong ka jylla ba um dei ban pdiang ia ka kyrteng jong ka kumba la phah da u CEM jong ka KHADC u Bah Latiplang Kharkongor kum ka dy CEM hapoh jong ka KHADC.
