Jowai, Nailar 30: Ki ar tylli ki seng napoh East Jaintia Hills ka Jaintia National Council Central Body bad ka Khasi Hills Students’ Union Khliehriat Circle mynta ka sngi ki la leit iakynduh ia U EE ka MeECL Distribution bad revenue officer ka MeECL halor ka jingbym ioh tikna ia ka light katba ka bill ka wan kumba dei ban siew man la u bnai.
Ki la ialeit ia kynduh ruh sa ia u Chief Executive Officer ka MeECL Jowai, West Jaintia Hills ban ia kren halor ka jinglip light palat pud hapoh East Jaintia Hills. U CEO ruh u la kubur ia kane ka lip light bad khamtam ha kane ka taiew ba la leit ka lait ka duh shi taiew lynter man la ka sngi. Kane ka jingduh ia ka light u CEO u la ong ka dei namar ba dang iaid ka jingtrei, hynrei ka office ka la kum klet ban ai jingtip sha ki paidbah ba dang iaid ka jingtrei.
Kine ki ar seng ha ka jingiakren ki la pynrem ia ka jingbym ai jingtip ka office sha u paidbah khnang ba u paidbah un ym sah dum hynrei un shai ia ka daw bym lah ban ioh bording la ka dei katno katno sngi ruh. Na ka liang ka office u CEO ka la kular ba nangne sha khmat ka office kan pyntip sha u paidbah ha shwa ban pynduh bording khamtam ha ba dei da ka ba bun sngi.
Kine ki ar seng ki la kyntu ruh ia ka office u CEO MeECL Jowai, ban aiti noh ban peit katto katne por ia ka 33KV line kaba wan na Moostem substation kaba hapoh ka jing peit ka Jowai Division, sha ka Khliehriat Division khnang ba kan long ka jingmyntoi ia u paidbah. Bad ka kam kan long kaba kloi ban trei haba dob kino kino ki jingthut ha kane ka line . Kane ka long Katkum ka kyrwoh na u samla Wanshwa Suting President JNC Central Body bad Cherity Suja General Secretary KSU Khliehriat Circle.
