Leit pyniasoh PDF ki 3 ngut ki kyrtong ba rem MLA Election na Mawryngkneng ha u 2013

Mawryngkneng PDFShillong, Nailur 05: Mynta ka sngi lai ngut ki kyrtong MLA kiba la ia khun na ka Mawryngkneg LA Constituency ha u snem 2013, kita ki long u Dr OS Jyrwa, u Bah Highlander Kharmalki bad u bah Munu Paul Muktieh kine ki lai ngut mynta ka sngi kila leit ban pyniasoh ia lade bad ka seng People Democratic Front (PDF) bad la pdiang ia ki sha ka seng da u president u Bah Aibanlumlang Marbaniang ha ka jingialang paidbah kaba la long ha Sojryngkham.

Kitei ki lai ngut ki kyrtong kiba la ia khun ia ka MLA Election ha u snem 2013, u Bah Munu Paul Muktieh u la ia khun kum u kyrtong shimet ha kaba  u la ioh 2030 vote, U  Dr Osaphi S Jyrwa u la ia khun kum u jrtong shimet ha kaba u la ioh vote 3287 vote bad u bah Highlander Kharmalki na ka seng UDP ha kaba u la ioh 4170 vote. Ka jingia shnoh kti lang jong kine ki lai ngut ki kyrtong ka long ban wanrah ia ka jingjop ia ka seng PDF na ka Mawryngkneng Constituency ha ka MLA Election 2018.

Ha kane ka sngi ka PDF kala thung ia u Dr O S Jyrwa kum u president bad ia u bah MP Muktieh kum u working president. “Ka PDF ka ieng halor ki nongrim ban iada ia ki hok long trai jong ka jaidbynriew”, la ong u Bah HS Shylla haba kren ha ka jingialang nalor kiwei kiwei pat kiba la ai jingkren kynthup ia u Dr OS Jyrwa uba la pynpaw halor ka jingiakynduh jong u kum u kyrtong haduh hynne ka sngi ban long kum u nonglum ia kane ka jingialang bad uba la kyntu ba ia ka vote jong uwei pa uwei u nongshong shnong ka dei kaba kordor.

U President ka PDF ha shwa ban ai ka jingkhublei kitbok kitrwiang ia ki nongkitkam ka Party u la pynpaw ia ka jingsngew kmen ba ki paidbah da kawei ka jingmut ki la wan ban ia donlang ha kane ka jingialang ban pynkhreh na ka bynta ka Election 2018. “Ngi don ka nongrim treikam kaba skhem ha ka party naduh ba la seng ia ka bad ngi khmih lynti ba ngin ioh ban pynurlong ia ka jingang-nud uba bun balang ka bri u Hynniewtrep ban long ka Jaidbynriew kaba skhem khlem ka jingshah pyndik da kiwei pat”, la ong u Bah Aibanlumlang Marbaniang u ba la kyntu ruh ia ki paidbah nongkyrshan ka PDF ban long kiba don ia ka jingthmu ba skhem ban trei ban ioh ia u soh ka jingjop.

Na ka liang u Bah Highlander u la pynpaw ba ka jingwan pyniasnoh jong u bad ka PDF ka long da ka jingiasngewthuh lang bad ki rangbah bad nongkyrshan jong u kiba ju don ha ka UDP bad kiba la kthang ia ka rai u Dr Donkupar Roy kaba long kum ka rai jong u shimet hi ban ailad ia ka HSPDP na kane ka Constituency hadien ka jingiatehlok hapdeng ka UDP bad HSPDP na ka bynta ka Election MLA 2018.  ”Nga kyrmen ba ngin ioh ia ka jingjop da ka jingiatrei lang bad jingia-sngewthuh jingmut khamtam da ka jingkyrshan na ki riew rangbah”, la ong shuh shuh u Bah Highlander uba la knew ba ka thong jong u hi ka long ban kyntiew ia ka imlang sahlang lyngba ka koit ka khiah kumjuh ka pule dangle.

What Next?

Recent Articles

Leave a Reply

Submit Comment
*