Shillong, Naiwieng 15: Ka Khasi Hills Autonomous District Council mynta ka sngi kala khot ia ka jingialang ia ki rangbah shnong khamtam ia kiba dei jong ka sor Shillong ban pynsngewthuh ia ki halor kino ki kyndon kum ka dorbar shnong kin ai ia ka “No Objection Certificate” ha kaba ia dei bad ka Trading Laicesne.
U Bah Pyniaid Syiem Deputy Chief Executive Member haba kren ha ki lad pathai khubor ha dien jong ka jingialang, la ong ba la khot ia ki rangbah shnong khamtam jong ka sor Shillong ka long ban ia kren halor ki san tylli ki phang, ka jingkguid, ka jingkhang ia ka plastik, ka jingai NOC halor ka trading License, u Drok bad halor ka Khasi Hills Solid Waste management Bill kaba ynsa wanrah ha kane ka sien shong dorbar ka long la sngi baar.
Ha kane ka jingialang halor ka jingkhuid ka KHADC kan sa mang pisa ban pynkhuid ia ki wah ha kane ka sor Shillong, la bthah ia ki shnong ki thaw bad ki hima ban pynjari ha baroh ki shnong ha kaba ia dei bad ka jingkhang ban pyndon kam plastik, haba ia dei bad u drok ka KHADC kan sa ai jingthoh sha ka sorkar kumno ban khanglad.
U bah Paul Lyngdoh EM ba dei peit ia ka tnad khaii, u la iathuh ba mynta ka sngi la sam ruh ia ki jingthoh sha ki rangbah shnong baroh halor ka jingpynkhreh jong ka KHADC ba kumno ki dorbar shnong kin iaid ha kaba ai ia ka NOC na ka bynta ka trading License bad lada don ba pynkhien kim hap ha ka jingpynshitom jong ka ain.
Ban ai lad ia ki dorbar shnong ba kin ia peit bniah la buh ba lada don kano kano ka jingai jingmut ki dorbar shnong ki lah ban pynpoi sha ka KHADC ha lane shuwa ka 15 tarik Nohprah 2019. La ong ba ia ka NOC dei ban rai da ka Executive Dorbar ym da u rangbah shnong, ia ka NOC dei ban soi da u Rangbah shnong bad u Secretary shnong.
