Shillong, Nailar 18: U Deputy Commissioner jong ka West Khasi Hills u Arunkumar Khembavi u la khot ia ka jingialang ban ia kren halor ka ‘Tirot Sing Market Complex’ ha Mairang, ia kaba ym bei pisa da ka NEC bad ia ka bynta kaba nyngkong la mang haduh T.12.86 klur tyngka bad kane ka iew kan don haduh 370 tylli ki dukan.
Kane ka jingialang kaba la long mynta ka sngi ia kaba la khot da u DC la pynlong ha Mairang Civil Sub Division, ha kaba la don lang na ka NERCoRMP, ki sordar shnong, ka SDO jong ka Mairang Civil Sub Division kong F M Lakiang, u Syiem jong ka Hima Nongkhlaw u Pa’im Phrestar Syiemlieh u project manager jong ka NERCoRMP u Bah J Kharkongor. La don lang ruh u MLA u bah Metbah Lyngdoh.
Ha kane ka jingialang kaba la long ha Mairang ha ka sngi palei, u project manager jong ka NERCoRMP u Baj J Kharkongor u la batai ha kaba ia dei bad ka jingthmu ban tei ia ka Iew kaba la jer kyrteng U Tirot Sing Market Complex, ha kaba kan don ka jingkieng elevators, ki jaka ieng kali, ki CCTV, ki painkhana bad ia kane ka iew yn peit da ka Hima Nongkhlaw. Ia kane ka iew langstieh kaba don mynta yn pynpra shuwa shipawa na ka jingheh jong kane ka iew ba mynta.
La buh antad ba ia kane ka bynta kaba nyngkong yn pyndep hapoh ka 24 bnai, na ka bynta ban tei ia ka iing ka jingleit kan long T.9.8 klur bad mynta ka pisa ka la poi T.3.07 klur. Na ka liang jong u Syiem jong ka Hima Nongkhlaw u la ong ba halor kane ka phang la dep ban pynshai ia ki nongshong iew bad mynta kila pan jingmut bad lada don kiba kwah ban ai jingmut bad lada don kiba pyrshah.
Na ka liang jong ka SDO Mairang Civil Sub Division ka kong Lakiang kala ong ba ka dap da ka jingkmen ban don ia kum kane ka jingialang bad ka kyrmen ba ka jingtei ia kane ka iew kan long kaba iaid beit badmynta hapoh shibnai kin khot noh ia ka tender kumba la kren na ka liang jong ka NERCoRMP bad ka kyrmen ba kan ka kam iaid sha khmat.
