Lum u CEM ka KHADC ia ka jingialang halor ka Sixth Schedule, pep ki MDC na ka UDA

Shillong, Kyllalyngkot 16: U Chief Executive Member jong ka KHADC u Bah Latiplang Kharkongor mynta ka sngi u la khot ia ka jingialang jong baroh ki MDC bad ki kynhun seng bhalang ban ia mir jingmut halor ka jingkwah jong ka sorkar pdeng ban wanrah ia ka jingpynkylla ia ka Sixth Schedule.

Kane ka jingiakynduh lang kaba la long mynta ka sngi ha KHADC, kiba la ia poi ki long tang ki MDC kiba don ha ka kynhun United Democratic Forum (UDF) katba kiba don ha ka kynhun United Democratic Alliance (UDA) ki khlem ia poi sha kane  jingialang ban ia kren ia ka iap ka im jong ka jaidbynriew.Na ki seng bhalang kiba la ia poi ki long ka Synjuk ki khlieh Nongsynshar shnong, ka FKJGP, KSU, HNYF bad ka RBYF.

Haba kren ha ki lad pathai khubor ha dien ka jingialang, u Bah R L Blah Secretary ka Synjuk ki Khlieh ki nongsynshar shnong, u la ong ba ha ka jingialang kila shim ia ka rai ba kin leit ban ia kynduh ia ka Parliamentary Standing Committee ka ban wan sha Shillong ha ka sngi Saitjain ba kin pynpaw tang ia kawei ka sur.

Haba ia dei bad ki dkhot jong ka KHADC, kin kwah ba kin don 37 ngut na ka 40 ngut kaba ka sorkar pdeng kala tyrwa. Ka jingkwah ka long ba 35 ngut dei ban jied da ka ilekshon da u paidbah, ar ngut dei ban shut hung, u wei u shynrang bad kawei ka dei ban long ka kynthei.

Haba ia dei bad ka jingtyrwa ba dei ban thung MDC ia kiwei ruh ki riewlum, ha kaba ia dei bad kane kila rai ban pyrshah ba ym dei ban shah ban thung MDC kiwei ki jaidbynriew. Haba ia dei bad ka Para 12(a) jong ka Sixth Schedule ba ia ka bor dei ban pynkup ha u Lat jong ka jylla.

Kum ka kynhun kin dang ia kynduh biang shuwa ban ia kynduh ia u lamphang ka PSC bad ka kynhun ha ka 18 tarik mynta u bnai ka ban long ha Pinewood Shillong.

What Next?

Recent Articles

Leave a Reply

Submit Comment

*