Shillong, Naiwieng 14: Ki paidbah kiba shong basah ha ka thain border baroh kawei ba hap hapoh ka Mawsynram Constituency kila ioh ia ka jingmyntoi kaba khraw lyngba ka jingwan ban ai jingpynshai kaba janai bha da ki heh ophisar jong ka tnad Water Resources (WR) ha kaba iadei bad ki skhim bapher bapher na ka bynta ka jingmyntoi ka jong ki paidbah nongrep.
La lah ban pynpoi ia ki ophisar dei na ka jingtrei shitom bad shim khia bha da u MLA ka thain u Bah Himalaya Shangpliang uba la lah ban wan ialam ia kine ki ophisar jong ka tnad Water Resources ba kynthup naduh u Executive Engineer u PK Hajong lem bad ar ngut ki SDO ba kynthup ia u Bah WL Nari lem bad u Bah C Kynjing uba dei ruh u SDO ba dei peit ha Dangar ha kaba ia ka jingialang la pynlong ha ka Multipurpose hall ha Dangar hynnin ka sngi Nyngkong.
Ha shwa ban ioh ia ka jingpynshai na ki ophisar u Bah Himalaya Shangpliang haba kren ha kane ka jingialang ban pynshai sha ki paidbah nongrep jong ka dong border u la ong “Kane ka jingialang kaba nga la ialam ia kine ki ophisar jong ka tnad Water Resources shane sha Dangar ka long ba kane ka thain border baroh kawei kim shem la ioh ia ki jingiarap satia na kane ka tnad trei kam”.
U Bah Shangpliang u la ong ki don shibun bha ki nongrep ha kane ka thain ba ki ia kynduh jingeh namar ka jingkyrduh um te hapoh jong ka scheme jong ka Water Resources ki don ia ki scheme bapher bapher hapoh jong kane ka tnad trei kam na ka bynta ban ai jingiarap na ka bynta ki nongrep“Kane ka jaka sha them ka long ka jaka kaba shit bha bad ka khluid bad bunsien ki long ki jaka ba tyrkhong um te namar kata ka daw ba ngi sngewtuh ki don ki skhim ia kaba la tip kum ka Jalkun scheme kaba ai na ka liang jong ka sorkar India lyngba ka sorkar jylla” ong u Bah Shangpliang.
Khnang ba ki nongrep jong kane ka dong ka thain border kin sa ioh ia ka jingmyntoi lyngba jong kane ka skhim bad nga wan iaalm khnang ia kine ki ophisar ba kin pynshai shuh shuh kham bniah ia ka rukom ban pyntrei kam bad ba ha kano ka rukom ba kine ki nongrep kin ioh ia ka jingmyntoi.Ka skhim Jalkun leh se kan dei ka scheme ban iarap shimet shimet ia u nongrep jong kane ka dong bad ka thain.
Kane ka skhim Jalkun kadei ba kin tih ia ka pung um khnang ba kin shna da ki kynja nylla ban pynpoi um sha ki jaka rep ki nongrep te kane ka skhim kan ai ba kin tih ia ka pung bad ban pynlang ia ka um khnang ban aka kata ka pung um kin tan ia ka um sha ki jaka rep jong ki.
Na ka liang jong u Bah WL Nari haba ai jingpynshai sha ki paidbah nongrep nyngkong eh u la ai khublei kyrpang ia u MLA ha kaba kila ioh ia ka lad ban wan ai ka jingpynshai sha ki paidbah bad kumjuh ruh kumno ban pynpoi ia ki kam pynroi.
U la ong ba ia ka tnad Water Resources la seng ha u snem 2010 bad hapoh jong kane ka tnad ki don ar tylli ki bynta ban ai jingiarap sha ki paidbah, kaba nyngkong kadei ban ai um sha ki jaka rep lyngba ka irrigation bad kawei pat de ka dei ka jingai jingiada ia ki jaka rep ne ka flood control.Na ka liang jong u Bah Nari u la pynshai ruh ia kiba bun ki scheme ha kaba ki paidbah kila ioh ia ka jingpynshai kaba janai bha ha kiba bun ki liang ha kaba iadei bad ki skhim jong ka tnad WR.
