Shillong, Iaiong 22: Ha dien ka jingslap jur kaba ar sngi lynter ka South West Garo Hills District mynta ka sngi kala shah lynshop ha ka jingshlei um ha kaba bun bah ki shnong briew kila shah tap ha ka um, kynthup ia ka police station jong ka Mahendaganj bad ki surok kila julor.
Ha kane ka jingther jong u slap ka jingshah pynjulor kaba la ktah eh dei ki lyngkha kba, ki pung dohkha kila ngam hapoh um bad shibun kiwei kiwei ki jingthung jingtep bad ki surok ruh kila shah pynjulor ha kane ka jingshlei um.
Ki jaka kiba la shah ktah ki long kham tam eh ha ki bynta ba long madan kiba hap hapoh jong ka Zikzak C&RD block kum ka shnong Silkona, Nandirchar, Beparipara, Hridaypur, Daspara, Patelipara bad New Kalaichar, ki dei ki shnong kiba la shah jubor ha kane ka jingshlei um. Ia kiba bun ki paidbah la pynsah ha ka skul kaba don ha shnong Silkona.
Kat haduh ba thoh ia kane ka khubor yn shym lpat ioh kano kano ka jingpyntip ba kan don kano kano ka jingjia kaba sngewsih. Na ka liang jong ka DDMA kala phah ia ki briew ban leit ban ia rap ia kine ki briew kiba la ngat ha kane ka jingshah lynshop ha ka mariang.
U myntri rangbah jong ka jylla u Dr Mukul Sangma u la bethah ia ki bor ba dei peit ia ki District ba ki dei ban phah ia ka jingiarap sha ki lanot kiba la ngat ha kane ka jingshah lynshop ha ka mairang . Naka liang jong ki gram sevaks ba kin leit ban jurip ban lap ia ka jingduh na ka daw jong kane ka jingshlei um.
