Shillong, Naitung 26: Ka seng ki nongrep kaba kynthup ia ka jylla baroh kawei ka Hill Farmers Union (HFU) ka la maham tyngeh ia ki nongkhaii kiba ju myllien ban ot kilo be-ain ia ia ki mar rep ha Iewduh bad ki iew bapher bapher kiba don ha Ri Khasi Jaintia.
Katkum ka kyrwoh khubor na ka HFU la iathuh ba ka seng ka la ioh jingujor na ki nongrep ba ka jingot kilo ka long ym tang ha Iewduh, hynrei ha ki iew bapher bapher kynthup ha Ri-Bhoi, West bad Southwest bad kumjuh ruh ha Jaintia Hill District.
La iathuh ba ki nongrep ki la ujor ha ki nongialam ka HFU ba ha Bhoi Rymbong, Umroi, Umsning, ki thain Umphyrnai, thain Mawmih bad kiwei kiwei ki jaka ki nongkhaii ki ot kilo, kumta ka seng ka la hamam ba lada ki nongkhaii ki ialeh pyrshah ia ka rai jong ka KHADC ba la maham ban nym ot kilo hynrei ban ot beit tang katkum ka jingkhia jong ki byrni, lane khoh bad shang ba thew ia ki mar ka seng kam banse ban kem kumba kem ia kiba ot kilo ha Iewduh bad yn aiti beit ha ki bor jong ka ain.
Na ka liang jong u Bah Commander Shangpliang President bad u Bah Alfondbirth Kharsyntiew General Secretary jong ka HFU seng kmie ki la kyntu ia ki nongrep ba kin ujor sha ki nongialam ha ki Disrcit bad ki shnong bapher bapher ban kem mardor ia ki nongkhaii kiba ot kilo be-ain bad la kyntu ruh ba ki ha shnong bym pat thaw unit HFU dei ban thaw noh mardor khnang ba yn lah ban iatreilang ban rat dyngkhong ia kane ka jingeh bad kiwei kiwei ki ishu kiba ki nongrep ki iakynduh. Na ka bynta kino kino ki jingujor lah ruh ban phone beit beit ha u President bad General Secretary 8837287374 lane 9366601874.
