Shillong, Jylliew 07: U nongai buid jong ka seng North Eastern Hill University Student’s Union (NEHUSU) u bah Rangdajied Marwein, u la ai ka jingmaham ia ki bor pyniaid jong ka skul bah North Eastern Hills University (NEHU) ba kam dei ban ialehkai bad ka lawei jong ki samla pule.
Haba kren ha ki lad pathai khubor mynta ka sngi ha ophis trei kam jong ka seng NEHUSU, ha NEHU, la ong ba kane ka skul bah kala leh thulmur sha bapalat ha kaba kyntiew ia ki mark jong ki samla pule kiba dei ha semester kaba san jong ka BA mynta u snem. La iathuh ba haduh mynta kila ioh ia ki jingujor haduh 200 ngut na ki samla pule.
La iathuh ba na ki 200 ngut kiba la ujor ia kane ka jingkyntiew ia ki mark jong ki samla pule ka NEHU haduh mynta kala lah ban ai jingtip tang kumba 50 ngut bad na kine la shem ba 30 ngut ki long kiba ka NEHU kala pynbakla ia ka rukom kyntiew mark.
Khlem da jer kyrteng ia ki samla pule la ong ba don kiba ioh 9 mark ha ka result ba la pynbna da ka NEHU lyngba ka online bad haba la phah peit biang la ioh 39 mark, bad ki don kiba la mih ha ka online tang 3 mark katba ha ka result pat ki samla pule kila ioh 56, kine ki long tang ki katto katne.
Haba ia dei bad kine ki jingjia na ka liang jong ka NEHUSU kan leit ban ia kynduh ia u Vice Chancellor jong kane ka skul bah ba dei ban pynbeit ia kane ka jingeh ba kan nym jia shuh hadien ha bud kum kine ki jingpynbakla.
La iathuh ba kum kane ka jingbakla kala jia mynshem snem, tang ba ka dei tang ia ki samla pule hapoh ka NEHU, hynrei mynta kala jia ia ki samla pule ha ki Kolej kiba la pyniasoh bad ka NEHU. Na ka liang jong ka seng ka ong ba ka dei na ka system kaba ka NEHU kala buh.
