Shillong, Iaiong 28: Ha kine ki sngi la iohi ba bun ki briew kila buh ia ki dur bad bideo khlem akor ha FB bad lyngba ki WhattApp, na ka liang jong ki pulit kila maham jur ia kine ki jingleh bad lada lap yn kem ia kiba don kti bad kin ngat hapoh jong ka IT Act, 2000.
Na ka liang jong ki pulit kila ong ba dang shen kala don ka jingbuh ia ka bideo jong ka khynnah hapoh jong ka FB kaba dei jong ka riew shimet bad ai ki jingkyntoh kiba long pyrshah bad kane ka ktah ia kiba shah thad bad kum juh ia ki kmie ki kpa jong kata ka iing ka sem.
Na ka liang jong ki pulit ki kyntu ia ki paidbah ba lada ki iohi ne lap ia kum kine ki jingbuh dur khlem akor dei ban pyntip sha kano kano ka shnat pulit kaba jan bad kin a ka bynta ba ki pulit kin ioh ban bud dien bad kem ia ki nongleh ia kum kine ki jaid kam pynkhlemrain.
La bethah ia baroh khamtam ia ki khynnah samla ba ki dei ban kiar na ka jingshon ne ring dur bad phah pat ia ki sha kiwei pat ki briew lane ban buh pat ha FB khlem ka jingbit jong u ne ka briew, lada leh khlem ka jingbit ka long pyrshah ia ka ain. Ha ka juh ka por la maham bay m dei ban buh kano kano ka jingkynthoh kaba lah ban ktah mationg iano iano. La kyntu ia ki paidbah ba kin kiar na kum kine ki jingleh.
