Shillong, Naiwieng, 13: Ka High Level Committee (HLC) jong ka Hynñiewtrep A`chik National Movement (HANM) kaba la shong ia ka jingialang ka sngi baar ka la thaw ka shnat ban iada ia ki jaka puta da ka jingbuh thong ban iada ia ki paidbah nongshong shnong ha khappud bad ka Jylla Assam.
U Bah Lamphrangsngi Kharbani, President ka HANM haba iakren bad u nongthoh khubor u la ong, “ka shnat ban iada ia ki jaka puta” jong ka seng bad lyngba kane ka shnat treikam, kin sa leit iakynduh ia ki Syiem, ki Dorbar Shnong bad ia ki paidnbah , la kumno kumno ha kaba sdang jong u snem 2019, ia ki Syiem, Dorbar Shnong bad ia ki paidbah kiba shong basah ha khappud bad ka Jylla Assam kiba ju iai mad bad iai shah pyndik manla ka sngi ha ka Sorkar Assam.
Kumba la suit la shor ia ka Seng naduh u snem 2008 ban ieng na ka bynta ka dawbah dawsan ban iada ia ka khyndew ka shyiap, nangne shakhmat ngin hap ban iakhun tyngeh namar ngi sngewthuh ba ka khyndew ka dei ka ri bad lada ngi duh noh ia ka khyndew ka shyiap ka mut ngi la duh noh ia la ka ri, ong u Bah Lamphrang.
U la ong shuh shuh ba kane ka jingialang jong ka Seng kaba la shong ha ka sngi ka la iatai sani bha halor ka jingkheiñ sting shaba palat bad ka jingleh mynthi shaba palat jong ka Sorkar Meghalaya ban iada ia u pud u sam, kaba la pynlong ia ka Sorkar Assam kat haduh ba ka shlur ban kyntur pud manla ka sngi da kaba pyntur da ki shipai ki swar bad ki phud ki pyrton Pulit ha khappud.
Kum ka seng kila la iathir sani bha ruh halor ka jingshlur ka Sorkar Assam ban phut bad jynrat wat ia u mawpud ka Meghalaya kaba la jia dang shen ha ka shnong Khanduli, la ong une u Nongialam ba hakhliehduh ka HANM bad bynrap ba kane ka jingiathir ka long da ka jingiashim bynta lang ki Nongialam ka Seng na East Khasi Hills, West Khasi Hills, South West Khasi Hills, West Jaiñtia Hills bad na East Jaiñtia Hills District.
Ha kajuh ka por, ka seng ka ai khublei kyrpang eh ia u Samla Damonmi S. Dkhar, uba long u General Secretary ka Seng uba la shongthait bad rung mynta sha ka jylli jong ka saiñpyrthei bad uba la pynbna ruh ban iakhun ia ka elekshon MDC ha u snem 2019 sha ka ingdorbar jong ka JHADC.
Ka seng ai khublei kyrpang ia u Samla Damonmi bad ngi kyrmen ruh ba un ioh ia ka jingjop ia ka elekshon MDC kaba un sa iakhun na Nartiang Constituency khnang ba un nang lah shuh shuh ban ai ka jingshakri kaba kham bha sha ka jaidbynriew,” ong u Bah Lamphang.
Ha jingpynthymmai ia ki nongkitkam mynta ka sngi, ka seng ka la bynshet biang ia ka kam President ha u Bah Lamphrangsngi Kharbani, Vice President Bah Nelson Kharbani, General Secretary Bobby Basaiawmoit, Asst. Secretary Bah T. Kharir bad Bah Michael Kharmuti, Finance Secretary Bah K. Nongbri bad kiwei kiwei ki nongkitkam ka Central Body. Ki President bad ki General Secretary jong ki District, ki Circle bad ki Unit kin long ki Executive Member.
