Shillong, Jylliew 06: U Bah John F Kharshiing, Chairman, Ka Dorbar The Grand Council of Chiefs bad spokesperson, Federation of Khasi States, ha ka 4tarik June 2018, kum shibynta ban buddien ia ki jingiakren kiba la mih halor ka Sixth Schedule ki la ia kynduh ia u Shri Satyendra Garg, IAS, Joint Secretary, North East, Ministry of Home Affairs, Govt of India, ha New Delhi, ban buh ia ka dorkhast halor ka jingsahteng ki jingiateh bad ki jingkular halor ki dulir Instrument of Assession bad Annexed agreement 17 August 1948.
Hadien ka jingiakren kaba sani bha bad hadien ka jingpyni ia ki shithi kiba la shu iaid pyllun na ka ki bor office na Delhi sha ka Sorkar Jylla bad khamtam hadien ba iohi kumno ba ki bor Khasi Hills Autonomous District Council kim shym la jubap naduh ka 3tarik August 2012, ia ki shithi kiba la phah na ka State Government bad Ministry of Home Affairs, Govt of India, halor ka jingpan jingshai u Joint Secretary, North East, (MHA), na ka Sorkar Jylla Meghalaya, halor ki jingbthah na ka bor National Commission for Schedule Tribes, NCST, bad ki jingai jingmut na ka bor National Human Rights Commission, (NHRC) ha kaba utei u heh Joint Secretary, (NE) ka tnad Union Ministry of Home Affairs, (MHA) u la ong ba lada ka District Council kam jubap kam pher hynrei ka Sorkar Jylla ka la dei ban shim khia ban jubap namar ia kitei ki jingai jingmut na ka Sorkar Jylla ki hap ban phah namar ka dei ka kamram ka jong ki ban jubap halor ki jingbthah jong ki bor NCST bad NHRC.
Ha kaba iadei bad kane ka phang u Joint Secretary, NE, MHA, hadien ba la iohi ki jingshad sawdong ki shithi u la ong ba un sap phah biang sa kawei ka shithi sha ka Sorkar Jylla ban jubap khlem da ap ia ka jubap na ka District Council namar ka paw ba ka don kaei kaei sha lyndet.
Ha kitei ki jingiakren u Bah John F Kharshiing, u la pynshai ha utei u Joint Secretary, ba kumba long mynta baroh kawei ka pyrthei ka tip ba ki District councils hapoh Meghalaya ki la shu long tang kum ki jaka kynthih ki nongsain pyrthei ban long MLA bad la jan baroh ki seng sain pyrthei (political parties) ha Meghalaya ki la ia leh kiar ban pdiang ia kane ka jingduna kaba paw shai kdar hapoh ka Sixth Schedule bad ka Constitution Ri India.
Ha kaba ia tai sani bha halor ki jingai Grant sha ki bor District Councils utei u heh u la ong ba ka jingthmu ka long ban mang kyrpang ia ki Dorbar Shnong, ter ter haduh Dorbar Hima, bad ia kitei ki kam dei ba kin pyniaid lane ai jingmut hi ki Dorbar traditional Institutions, u Bah John F Kharshiing, Chairman, The Grand council of Chiefs of Meghalaya, & Spokesperson, Federation of Khasi States, u la ong ba ki jingthmu mang pisa kumba long mynta ka long leh noh ei namar kitei ki jingmang pisa kim shym la poi sha ki Dorbar kumba thmu (devolution of powers) hynrei ki scheme na ka bynta ki Dorbar Shnong ki la kylla long pynban kiba la wan na kyrpong iing ban kylla long ki MDC scheme.
U Bah John Kharshiing, u la ong ba ka thong ba kongsan jong ka NITI Aayog bad MHA ba katei ka scheme kan wan naduh na shnong, na ki jingaijingmut jong ki shnong, hynrei katei kam shym long kumba ki la thmu namar ki kam baroh ki la long kiba la pyniad tang da ki riewshimet mawei kumba ka la paw ha kine ki sngi lyngba ki kotkhubor khamtam ha kaba la mih ka jingkynnoh halor ka jingpyn donkam bakla ki bor District Council ia ki scheme na ka Sorkar India namar kam don ka jingsynshar kaba khuid ba suba hapoh Khasi Hills Autonomous District Council.
Kumta u Bah John F Kharshiing, u la ong ba lymda kibor Sorkar India, ki mang la ka jong ka jingmang tyngka sha ki Dorbar Shnong, Raid bad Hima, baroh ki jingmang kum ba long mynta ki long leh noh ei namar kitei ki jingmang tyngka ki long beit tang na kabynta ki MDC ba kin pyndonkam kum ki MDC Scheme kaba ki sam kum ba sam ia ki MLA bad MP scheme kiba long beit tang na ka bynta kiba iadei rong bad kane ka dei ka jingiapher hapdeng ki jingsynshar sainpyrthei bad ki jingsynshar dorbar kaba khlem liang.
U Bah John F Kharshiing, Spokesperson, Federation of Khasi States, u la ong ba lada ka sorkar India kan ngam jylliew halor kine ki jingkulmar kiba don mynta hapoh Shillong ka Sorkar India kan sa lap ba katei ka jingiakynad ka mih namar ka jingbym pat ithuh ia kitei ki jingsynshar Dorbar Khasi States, ki Sirdar, ki Dolloi, ki Nokma, hapoh ka Constitution Ri India kiba long ka daw bah ia ki jingiakhih hapoh jylla Meghalaya na ka por sha ka por.
U Bah John F Kharshiing, Spokesperson, Federation of Khasi States, haba ai ia katei ka dorkhast u la pyntip ia utei u Joint Secretary, NE, MHA, ba ka Dorbar Federation of Khasi States ka la shim ia ka rai ban leit buh ia kane ka phang Instrument of Accession and Annexed Agreement hakhmat ka Dorbar United Nations Organisation (UNO), namar ka Sorkar India, kam shym shim khia halor ki jingthoh ki jingdawa na ka liang ki Syiem, Lyngdoh, Dolloi, bad Nokma na ka Federation of Khasi States, ba la phah sha ki President of India, Prime Ministers, Union Home Ministers, Union Minister of State (Home), Union Tribal Affairs Ministers, Union Secretaries MHA, Joint Secretary (NE), Chief Ministers of Meghalaya, ki CEMs of Khasi Hills Autonomous District council, National Commission for Scheduled Tribes, National Human Rights Commission (Law Division) naduh ki snem 1950 hadien ka jingsoi bad jingmynjur ia ka ki dulir IOA & AA ha ka 17 tarik August 1948, hapdeng ka Sorkar India bad ka Federation of Khasi States, ban ioh ka jingtihuh ka kyrdan kaba shai hapoh ka Constitution Ri India kam shym urlong haduh kine ki sngi.
