Shillong, Risaw 14: Naduh ba sdang ka jingwan kane ka khlam COVID-19 ha kane ka jylla Meghalaya la khang ia ka iew hat Lyngkhat bad mynta la ar snem khlem pat plie ia kane ka iew da kane ka sorkar MDA, kane ka iew ka hap hapoh ka konstitwensi jong u bah Prestone Tynsong.
Na ka liang jong ka TMC ka kynnoh ba u MLA jong kane ka jaka u ba ei ruh u symbut myntri rangbah ka jylla u khlem pat leit sha kane ka jaka ha kine ki ar snem, kane ka iew ka dei kawei na ki iew kiba ai jingim ia kiba bun ki paidbah nongshong shnong.
Ki nongrep kiba ia dei ia mar rep jong ki ha kane ka iew kala ktah ia ki shibun eh namar ba ka sorkar MDA kam shym leh ei ei ha kine ki ar snem bad kane ka jingleh kala buh ia ki nongdei ha kane ka iew ha ka jingeh ban im ja kpoh.
Na ka liang jong ki paidbah ka thain kila kyntu ia ka sorkar ba kan plie biang nohia kane ka iew kaba ki paidbah ki don kam ban ia die ia thied ia ki marrep kiba mih na kane ka thain.
U Rangbah shnong barim kane ka shnong Lyngkhat u bah Miffed String Khongtiang la ong ba u MLA kane ka jaka u bah Prestone Tynsong um juh poi sha kane ka jaka, ka jingkhang sah ia kane ka iew kam dei ka jingduh tang ia u hynrei ia baroh. Ka long kaei kaei kaba eh khlem don ka iew la pynpaw ki nongshong shnong.
