Shillong, Jymmang 23: U Symbut Myntri Rangbah ka jylla u Bah Prestone Tynsong u la iathuh ba mynta ka sngi ki briew jong ka jylla Meghalaya kiba don 231ngut kiba wan na ka jylla Telengana kin poi ha Guwahati bad kiba na Harayna 139 ngut kin poi la shai ka sngi.
Ka Rel ka ban mih na Jaipur kan long ha ka 26 tarik mynta u bnai ia ki briew katno ngut ki ban wan ym pat tip namar ba ka jingshim kyrteng ka dang iaid ynda la ioh lut ia ki kyrteng yn sa lah ban ong kato ngut ki don.
U Bah Prestone u la ong ba ka Rel na nongbah Delhi kan mih ha ka 27 tarik mynta u bnai bad ka jingpynrung kyrteng ka dang iaid kumta u la kyntu ia kiba don ha Delhi bad sawdong jong ka ba kin phone sha kine ki number 011-23014451/011-23014341 bad ha u 9968262299.
Na ka liang jong ka sorkar ka dang ia leh ban pynioh ia ki Rel kiba kyrpang ban wan kit ia ki briew jong ka jylla, kum na Mumbai, Pune bad kiwei kiwei ki jaka, ka sorkar ka don ryngkat bad ki bad la kyrmen ba baroh yn lah ban pynpoi iing hapoh une u bnai.
La iathuh ba haduh mynta ka sngi baroh kiba la poi sha ka jylla na ki bynta bapher bapher jong ka Ri India kila kot sha ka 9000 ngut tam bad kiba dang sah ki long 6500 ngut.
La iathuh ba ka sorkar kala shim ia ka rai ban plie noh ban pyniaid ia ki Eroplane hapoh ka kad liengsuin Umroi ha kane ka taiew ban wan khnang ba ki briew kiba lah ban wan da ki eroplane ki lah ban wan phai.
Na ka liang jong ka sorkar kala buh ia ki ar tylli ki jaka trei kam, kawei ha Guwahati Air Port bad kawei ha Guwahati Railway Station ban wan ialam ia ki briew jong ka jylla kiba wan phai sha la ki shnong. Ki kmie ki kpa kim dei ban leit shaw ia ki hynrei ka sorkar kala pynbiang ia ki kali ban wan ialam ia ki katkum ki kyndon.
