Mairang, Risaw 08: Ka Holy Cross Health Centre, Mairang hynne ka sngi ka la ioh ban rakhe ia u mawmer jong ka jingdap 25 snem jongka ha ka prokram ba ishongkun ha kaba u myntri ka tnat ka koit ka khiah ka jylla u James P. K Sangma u la leit kum u kongsan ha ka jingdon ryngkat jong u Principal Secretary ka tnat ka koit ka khiah ka jylla u Sampath Kumar.
La don lang u MDC ka thain, u Bah Batskhem Ryntathiang , u Archbishop ka Shillong , u Archbishop Victor Lyngdoh , u Deputy Commissioner ka Eastern West Khasi Hills District, u Bah Wilfred Nongsiej, i Provincial Superior ka Holy Cross North Indian Province, i Sister Linet, i Administrator ka Holy Cross Health Centre, Mairang, i Sister Jesse Jose, ki doktor, ki ophisar sorkar, ki nongialam shnong ka thain bad kiwei kiwei.
Ha ka jingkren jong u kum u kongsan, u myntri ka tnat ka koit ka khiah jong ka jylla, u James P.K Sangma haba ai khublei ia ki bor pyniaid jong ka Holy Cross Health Centre, Mairang halor u mawmer jong ka jingdap 25 snem jongka, u la kren shaphang ka jingiaid lynti jong kane ka jaka ai jingsumar nongpang.
Naduh ba la sdang ia ka bad ki jingeh kiba bun ba ki nongpyniaid ki la hap ban mad lyngba ki snem bad u la ong ruh ba ka jingdon jong ka Holy Cross Health Centre ka long sakhi ia ka jingtreishitom bad jinglenlade jong ki bor pyniaid jong kane ka jaka sumar nongpang bad ki jingpyrshang jongki ban ai iala ka jingshakri sha ki paidbah jong ka dong ka thain.
U kongsan u la ong ruh ba ka jingrakhe ia kane ka jubili rupa ka pynioh ha ki nongpyniaid iaka lad ka kabu ban phaidien sha ki snem bala leit noh, ban kynmaw ia u synniang ba ki nongtrei bad nongpyniaid kiba hashwa bad kiba mynta ki la noh bad ban phaikhmat pat sha ka lawei bad ki thong thymmai nangne shakhmat kum shibynta jong ka jingbteng iala ka jingshakri ia ki paidbah ka thain.
Haba kren halor ki jingiatreilang hapdeng ka sorkar bad ki kynhun shimet ha ki por ba la leit noh, u myntri ka tnat ka koit ka khiah u la pynpaw ia ka jingkyrmen ban iohi shuhshuh ia kiwei pat kiba kum kita ki jingiatehlok ha ki por ban bud kum shibynta jong ka jingshakri ia ki paidbah nongshongshnong lyngba ka tnat ka koit ka khiah.
La pynphuh pynphieng shuhshuh ia kane ka jiingrakhe da ki jingshad bad jingrwai na ki nongtrei jong ka Holy Cross Health Centre bad ha kane ka sngi la ioh ruh ban pynkupburom ia ki katto katne ki nongtrei jong kane ka jaka sumar nongpang.
Kiwei pat kiba la kren ha kane ka prokram ki kynthup ia u Principal Secretary ka tnat ka koit ka khiah ka jylla Meghalaya, u Sampath Kumar, u Archbishop ka Shillong, u Archbishop Victor Lyngdoh, u Deputy Commissioner ka Eastern West Khasi Hills District, u Bah Wilfred Nongsiej, i Provincial Superior kaHoly Cross North Indian Province, i Sister Linet bad i Administrator ka Holy Cross Health Centre, Mairang, i Sister Jesse Jose.
