Shillong, Jymmang 17: Mynta ka sngi la sdang ia ka jingpynkhuid ia ka Bethany Hospital Shillong bad kane ka jingpynkhuid ka long ia baroh kawei ka Hospital bad ha dien ba la dep ban pynkhuid yn sa synreit dawai bad kane ka jingpynkhuid ka dang iaid.Ia kane ka jingpynkhuid la leh hapoh ka jingpeit jong ka tnad ka koit ka khiah jong ka sorkar jylla.
U Dr Kyntiewlang Sanmiet u la iathuh ba la leh ia kane ka jingpynkhuid ia ka hospital ka long katkum ki kyndon kiba la buh ia kaba la tip kum ka “Hospital Infection Prevention and Control guidelines by National Centre for Disease Control” (NCDC), ba dei lyngba ka Ministry ka tnad ka koit ka khiah jong ka sorkar pdeng, ha dien ba la pynkhuid yn pynbut sa ka jingsynreit dawai katkum ki kyndon.
Ha ka kyrteng jong ka Bethany Family, u Dr Sanmiet u ai khublei kyrpang ia u Commissioner bad Secretary ka tnad ka koit ka khiah jong ka sorkar jylla u Sampath Kumar bad ia u Director jong ka Health Services (MI), u Dr. Aman War kiba la iarap ha kane ka jingpynkhuid.
U Dr Sanmiet u la ong ba ki khmihlynti ba nangne sha khmat kin lah ban rah biang ia ka nam ka burom jong ka Hospital bad kin dang kham kut jingmut ban ai ka jingshakri ia kiba pang ba shitom da ka jingsngewrit bad ka jingieit ia baroh.
