Shillong, Iaiong 19: Mynta ka sngi la tep don burom ia u Deenadayalan Vishwa nongialehkai table tennis na khlad ha ka jingiatyngkhuh kali ha Shangbangla ha Ri Bhoi District por ba dang wan ban ia shim bynta ha ka jingialehkai jong ka 83rd Senior National Table Tennis Championship.
U nonghikai ialehkai Table Tennis ka Tamil Nadu u Ramesh Babu jong ka Tamizagha Table Tennis Association (TTTA) la ong ba u Deenadayalan Vishwa u long u nongialehkai bat bit bha bad u la jop shibun ki jingialehkai ym tang ha ka Ri India hynrei wat shabar jong ka ri ruh.
Ha katei ka jingjia kaba sngewsih ba la khlad lang dei u nongniah ia ka kali u Dipal Das, kiwei ki nongialehkai kiba don lang ha katei ka jingjia ki long u R Santosh Kumar, D Kishore Kumar, S Abhinash Prasannaji kine kila mynsaw ia kine la pynkit sha NEIGRIHMS ban sumar la phah ia ki sha la iing mynta ka sngi.
U nonghikai ban ia lehkai Table Tenis jong ka Tamil Nadu u la ai khublei kyrpang ia ka Meghalaya Table Tennis Association, Ri-Bhoi police bad ia ki bor jong ka district administration Ri Bhoi District kiba la iarap met bad mynsiem ha katei ka jingjia kaba sngewsih.
Katba kiwei ki nongialehkai ka TTTA hapdeng kane ka jingduh kila ialehkai bha ha kane ka jingiakop jong ka 83 Senior National Table Tennis Championship kaba dang iaid mynta ha SAI Indoor Stadium ha NEHU Shillong.
