Shillong, Naitung 26: Mynta ka sngi ka tnad pulit jong ka shnat tohkit ka sorkar Meghalaya kala phah da ka jingthoh sha baroh ki Director General ki pulit jong baroh ki jylla bad ki Union Territory jong ka Ri India ban kem ia u Bernard N Marak.
Ha ka shithit kaba la phah sha baroh ki jylla ka long ba ka jingthwet ban kem ia u Bernard N Marak ka long halor ka jingkynnoh ba la pynkhein ia ka ain khaii briew na ka bynta ki kam awrai katkum ka ejahar kaba la ujor sha Police Station jong ki kynthei ha Tura.
Katkum ka jingthoh kaba ki pulit kila phah ka long ba u ba ki kwah ban kem, ka kyrteng jong u dei Bernard N Marak 52 snem na Danak Kombe na jan jong ka Don Bosco College, Tura bad nalor ka ktien Garo u nang ban kren ia ka ktien Phareng, Hindi, Assamese bad Bengali.
Ha ka jignthoh la kyntu ia ki Director General ki pulit jong ki jylla ha ka Ri India bad ia ki Union Territory ba kin pyntip sha baroh ki police station hapoh ka jylla jong ki ban kem ia u tei u briew u ba la ai kyrteng u Bernard N Marak.
