Shillong Risaw 11: Na bynta ban pynkhlain ia ka party ha ki Kontiwensi bapher bapher, ka Executive Committee United Democratic Party (UDP) East Khasi Hills District mynta ka sngi ka la lum ia ka jingialang kaba kyrpang ka party bad ha kane ka sngi la jied ruh ia ki katto katne ngut ki nongkitkam ka party na bynta ban pyndap ia ki kam ba sah thylli ha ka party.
U President ka UDP East Khasi Hills District u bah Titosstar Chyne haba kren sha ki lad pathai khubor hadien ba la wai ka jingialang, u la ong ba ka mat ba kongsan ba ki iakren ha kane ka sngi ka long ban pynkhlain ia ka party ha ki konstiwensi bad ka katkum ka kaiphod ba la ioh pdiang na ki shnat, ka long ba ka party ha baroh ki 10 tylli ki konstiwensi ha East khasi Hills ka paw ba ki khlain.
U nongialam ka UDP, EKH u bah Titosstar u la ong ba ka party haduh mynta ka la ioh pdiang ia ki 5 tylli ki Aplikeshon jong ki kyrtong ba la tyrwa da ka Circle. “Mynta ka sngi, na ka District Election Committee ngi la mynjur ia ki 5 tylli ki kyrteng ba la phah na ka shnat.
Kine ki kynthup na Sohiong la phah ia ka kyrteng jong u bah HDR Lyngdoh na Sohiong, Mawsynram u bah Oland Suin, Mylliem u bah Michel Wankhar, Pynursla u bah Anthony Khongwang bad Shella u bah Balajied Synrem. Katba kiwei ki konstwensi ki bym pat phah ia ka Aplikkeshon ki long ka Mawryngkneng , Nongkrem, Sohra , Mawphlang bad ka Mawkynrew.
Ha kane ka sngi, ka party ka la pynkhlain ruh ia ki nongkitkam jong ka District bad ia ka kam Adviser la pynkhamti ha u bah Balajied Synrem, Working President u bah Remington Pynrope, u Dr OS Jyrwa bad u bah Monarch Shabong, Vice President u bah Wellbirth Rani nalor kiwei de.
Ka United Democratic People (UDP) hynnin ka sngi ka la lum ia baroh ki nongialam bad ki MLA ka party ha ka jingialang jong ka committee kaba kyrpang jong ka party ban iakren bad pan jingshai na u Myntri ka tnad Kam Pohiing ka sorkar jylla u bah Lahkmen Rymbui halor ka jingjia pyrshah ia ki nonghikai kontrak dang shen.
Halor ka dawa ki nongialam ka UDP ban hiar shuki ia u bah Lahkmen Rymbui kum u Myntri ka tnad Kam Pohiing ka sorkar jylla, u President ka UDP East Khasi Hills District u bah Titosstar Chyne u la ong, ka party kam shym la ai ia kano kano ka jingthoh halor ka jingdawa ban hiar shuki ia u bah Lahkmen Rymbui hynrei lehse kane ka lah ban dei tang ka jingkren sha ki lad pathai khubor.
Kum ka party kala kylli na u President ka party bad namar ba kam don kano kano jingthoh na kino kino ki nongialam ka party ban dawa hiar shuki bad lehse ka lah ban dei tang ka jingkren tang ha ki lad pathai khubor . Na ka liang ki nongialam ka party ki shim khia bad ha kajuh ka por ngi pynrem ruh ia ka jingleh jong ki pulit pyrshah ia ki nonghikai,la ong u bah Titoss.
Haba iadei bad ka jingkawang lyer sat khmat ne u tear Gas ia ki nonghikai, u bah Titoss u la ong, kum ki nongialam ka party, kila kren da kaba shai ia u Myntri ka tnad Kam Pohiing , haba iadei bad kato ka jingjia kaba kawang jingpynsat kmat ia ki nonghikai kiba iakhih bad kila pan ia ka jingshai bad u la ong ba u dang ap ia ka kaiphod bad ynda la iohpdiang ia ka kaiphod yn sa leh ia kaba donkam bad ngin iai ap shwa ia kata.
Ha kajuh ka por, u la ong ba ha ka jingshisha kadei ka District Administration kaba pyniaid ia ka shongsuk shongsain ha ka jylla bad kine ki huri hura ki mih kadei namar ka jingbym lah ki bor synshar ban pyniaid.
