Shillong, Jymmang 06: Mynta ka sngi ka KSU North Khasi Hills District Unit bad KSU South West Khasi Hills District Unit ka la pdiang burom ïa arngut ki samla khasi kiba la mihkhmat bad wanrah jingjop ha ka Indo-Nepal International Youth Futsal Cup 2022 kaba la long ha Pokhara, Nepal.
Kine ki ar ngut ki samla ba mihkhmat ia ka Ri India ki kynthup ia ka samla Liza Muktieh na ka shnong Lumdaitkhla, Ri Bhoi District bad Fragrancy Riwan na ka shnong Lawbah,East Khasi Hills District.
La pynlong ia ka jingïalang ba lyngkot ha kaba la ai jingkren da u samla Lambok Rymbai-Vice President KSU North Khasi Hills District Unit bad Samborlang Shabong Asst. GS KSU SWKHD.
U samla Lambok Rymbai u la pynpaw ïa ka jingsngewkmen bad jingsngew sarong ïa kine ki samla ba la wanrah burom ia ka jaitbynriew. Kiba bun ki samla khasi ba donsap ha ki jingïalehkai bapher bapher pynban ki ïakynduh jingeh na ki daw ka jingbym phai khmat ka sorkar ban kyntiew lem ha kane ka bynta bad ka jingbymdon ïa ka Sports policy kiba paka.
Namarkata ka KSU ka kyntu ïa ka sorkar ban pynkloi noh ha ka ban pynwandur bad pyntreikam noh ïa sports policy ba biang khnang ba kan long ka jingmyntoi ïa ki samla jong ka jylla baroh kawei kiba don ia ka sap ka phogn ha ki kam ialehkai.
La ai jingkren u Samla Samborlang Shabong ha kaba u la ong ba ki ka KSU ka sngew ban ai ka jingpyrto ia ki samla ba ioh mihkhmat ia ka Ri India namar ka Jaidbynriew kam duna ha baroh ki liang hynrei ka dang donkam shuh shuh ia ki Samla ka Jaidbynriew ba kin pynleit jingmut bad pyndonkam hok ia ka sap.
Kane ka long ba kin lah ban iai kyntiew shuh ia ka Jaidbynriew, ha kane ka sngi la ia jingïadonlang u Samla Johny Nongrum Sports Secretary KSU NKHD, samla Steven Kharkrang Asst GS KSU NKHD unit ki dkhot napoh KSU Lawbah Circle bad KSU Umïam Circle.
