Shillong, Nailar 22: Ka seng HYC mynta ka sngi kala sdang ia ka jingiaid ia ka rally kaba lai sngi kaba la sdang mynta ka sngi 22 tarik na Nongstoin bad kin pynkut ha Shillong ha ka 24 tarik mynta mynta u bnai. Kane ka jingiaid kala sdang ha ka por 7 baje mynstep mynta ka sngi.
Ka jingpynlong ia kane ka jingiaid paidbah kaba lai sngi jong ka seng HYC, ka long ban pynsngew sha ka sorkar ba ka dei ban pyntrei kam ia ki 14 tylli ki mar jingdawa jong ka seng ban iada na ka jingtuid kyrthep ki briew kiba na bar sha kane ka jylla, ka seng ka ieng halor ka nongrim ba dei tang ka ILP kaba lah ban iada ia ki briew kiba na bar ban wan sha kane ka jylla.
U Bah Robertjune Kharjahrin general secretary jong ka seng u la iathuh ha u SP News Agency ba kane ka jingiaid paidbah kaba lai sngi na Nongstoin ka nongbah jong ka West Khasi Hills District la sdang mynta ka sngi ha ka por 7 baje mynstep bad kane ka jingiaid kin pynkut mynta ka sngi ha Mariang.
La shai ka sngi kin mih na Mairang kin iaid bad pynpoi sha Mawngap, bad la shisngi mynstep kin mih na Mawngap bad kin poi sha Shillong. Kane ka jingiaid paidbah jong ka seng HYC ka long ban pynpaw sha ka sorkar ia ka jingdawa jong ka seng bad ba ka sorkar ka dei ban pyntrei kam noh.
