Shillong, Iaiong 04: Mynta ka sngi, ka KSU Jowai Circle bad ka KSU Moodymmai Unit ki la ioh ban kem 10 ngut ki Bangladeshi na Thadlaskien kane ka jingioh kem ka dei ha dien ba la ioh jingtip ba ki don ki briew kiba iaid lyngba katei ka surok bah.
Ki dkhot ka KSU lyngba ka jingpyntip ki katto katne ki riew paidbah ki la ap shrip ha man la ki thaiñ ka Jaintia Hills bad dei hapoh ka shnong Thadlaskeiñ ba ki dkhot ka KSU ki la bat ia kawei ka trok kaba don u nombor RJ 07 GB 2246.
Na kane ka trok ki dkhot ka seng ki la lap ia 10 ngut ki dkhar kiba shong rieh hadien kane ka trok. Ki dkhot ka seng ki la tohkit ia kine ki briew kiba i shan khmat bad kine ki briew kim shym lah ban pyni ia ki kot ki sla ba ki dei ki nong India, hadien kane kita ki dkhar ki la phla ba ki dei kiba dang shu wan rung tuh na Bangladesh.
Hadien kane la wan ki pulit na ka Infiltration department bad ki la pynphai noh ia kine ki Bangladeshi shabar u pud u sam ka Meghalaya. Ia ka kynhun jong ka KSU la ialam da u samla Phraki Howni Thubru uba dei u General Secretary ka KSU Jowai Circle, u samla Jerrymaia Laloo uba dei u Assistant Finance Secretary ka KSU Moodymmai Unit bad u samla Phrangki Papang.
Ka KSU Jowai Circle ka pynpaw ia ka jingbitar pyrshah ia ka sorkar jylla bad sorkar India halor ka jingbymlah ban pyntreikam ia ka ILP tad haduh mynta kaba la ailad ia ki mynder ri bad bar jylla ba kin rung laitlan ha ka Bri U Hynniewtrep ka ba la buh jingma pat ia ka Jaidbynriew Khasi ba rit paid kaba lah ban poi shaduh u pud jong ka jingduh jait.
Ka KSU ka kyntu sha baroh ki paradoh parasnam ka thaiñ Jaintia Hills naduh ki shnong haduh ki Seiñ Khynroo ba kin long kiba pyrman bad pyntrei kam hi ia la ka jong ka ILP ban teh lakam ia ka jingwan rung kyrthep ki briew kiba na bar la ong u samla Juhhi Tariang nongai khubor ka KSU West Jaintia Hills District.
